काठमाडौं, आउँदो १५ वैशाखमा हुने उपनिर्वाचनका उम्मेदवारको टुंगो लगाउन नेपाली कांग्रेसको कार्यसम्पादन समितिको बैठक आज पनि बस्दैछ ।
प्रचार विभागका प्रमुख मीन विश्वकर्माका अनुसार बैठक बिहान ९ बजे बुढानिलकण्ठस्थित सभापति शेरबहादुर देउवाको निवासमा बस्न लागेको हो ।
देउवाले उम्मेदवार चयनका विषयमा सोमबारदेखि छलफलमा गरिरहेका छन् । मंगलबार र बुधबार कार्यसम्पादन समितिको बैठकमा उम्मेदवारबारे छलफल भएपनि सहमति जुट्न सकेन ।
उपनिर्वाचन हुने इलाम–२ र बझाङ प्रदेशसभा–१ मा उम्मेदवारका विषयमा सभापति देउवा र नेता शेखर कोइराला पक्षबीच सहमति जुट्न नसकेको हो ।
सभापति देउवाले इलाम–२ मा जिल्ला सभापति डम्बर खड्का र बझाङका लागि अभिषेक सिंहको नाम प्रस्ताव गरेका छन् ।
तर, कोइराला समूहले भने इलाम–२ मा महाधिवेशन प्रतिनिधि भेषराज आचार्य र बझाङमा जगत जोशीलाई उम्मेदवार बनाउनुपर्ने अडान राख्दै आएको छ ।
उम्मेदवार चयनकै विषयमा बिहीबार जिल्लाका नेताहरूसहित आकांक्षीसँग छलफल गरिने प्रचार विभाग प्रमुख विश्वकर्माले जानकारी दिए ।
