काठमाण्डू, लगातारको वर्षासँगै आएको पहिरो, बाढी र नदी कटानका कारण देशका विभिन्न प्रमुख राजमार्ग तथा सडकखण्डमा यातायात सेवा गम्भीर रूपमा प्रभावित भएको छ।
नेपाल प्रहरीले शुक्रबार बिहान ६ बजेसम्मको अद्यावधिक विवरण सार्वजनिक गर्दै देशभरका ९ वटा प्रमुख सडकखण्ड पूर्ण रूपमा अवरुद्ध रहेको जनाएको छ।
मनसुन सक्रिय भएसँगै पहाडी तथा हिमाली क्षेत्रमा पहिरो खस्ने क्रम नरोकिएको र नदीहरूमा बहाव बढ्दै गएकाले राजमार्गहरूमा यात्रा थप जोखिमपूर्ण बन्दै गएको छ।
त्यसैले प्रहरीले अत्यावश्यक कामबाहेक यात्रा नगर्न तथा यात्रा गर्नुअघि सडकको पछिल्लो अवस्था बुझ्न आग्रह गरेको छ।
बीपी राजमार्ग र कान्ति लोकपथमा समय तोकेर सवारी सञ्चालन
प्रहरीका अनुसार काभ्रेपलाञ्चोक–सिन्धुली जोड्ने बीपी राजमार्ग अन्तर्गत खुर्कोट–नेपालथोक–कटुन्जेबेँसी सडकखण्ड मा सम्भावित बाढी र नदी कटानको उच्च जोखिम रहेकाले हरेक दिन साँझ ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ।
यस्तै, कान्ति लोकपथ मा पनि वर्षायामभर सुरक्षा व्यवस्थापनका लागि बेलुका ५ बजेदेखि बिहान ५ बजेसम्म सवारी सञ्चालन बन्द गरिएको छ।
यी ९ सडकखण्ड पूर्ण रूपमा बन्द
नेपाल प्रहरीका अनुसार हाल पूर्ण रूपमा अवरुद्ध रहेका सडकहरू यस्ता छन्–
इलाम नगरपालिका–९ (राजदुवाली) स्थित मेची राजमार्ग
सिन्धुपाल्चोकको भोटेकोशी गाउँपालिका अन्तर्गत जिरोकिलो–कोदारी क्षेत्रको अरनिको राजमार्ग
बागलुङको जैमिनी नगरपालिका–८ बेलबगरस्थित कालीगण्डकी करिडोर
रोल्पाको परिवर्तन गाउँपालिका क्षेत्रमा पर्ने घोराही–थवाङ सहिद राजमार्ग
मुगुको छायाँनाथ रारा नगरपालिका–७ स्थित नाग्म–गमगडी सडक
रसुवाको गोसाइँकुण्ड गाउँपालिका क्षेत्रमा पर्ने पासाङ ल्हामु राजमार्ग
अछामको पञ्चदेवल विनायक नगरपालिका–४ पानीखोलास्थित मध्यपहाडी लोकमार्ग
लमजुङको मस्र्याङ्दी गाउँपालिका–४ म्याग्दे भीरस्थित बेँसीसहर–चामे–मनाङ सडक
पहिरो तथा वर्षाका कारण प्रभावित अन्य स्थानीय सडकखण्डहरूमा पनि यातायात सेवा अवरुद्ध रहेको प्रहरीले जनाएको छ।
यी सडकखण्डमा पहिरो हटाउने र सडक खुलाउने प्रयास भइरहे पनि लगातारको वर्षाका कारण मर्मत कार्य प्रभावित भइरहेको छ।
दोलखामा वैकल्पिक मार्ग सञ्चालन
यता दोलखाको तामाकोशी गाउँपालिका–५ किर्नेटारस्थित लामासाँघु–रामेछाप सडकखण्ड तामाकोशी नदीको कटानका कारण अवरुद्ध भएको छ।
तर, यात्रुहरूको सहजताका लागि खिम्ती ग्रामीण विद्युत् सहकारी संस्थाको कार्यालय परिसर हुँदै वैकल्पिक मार्ग सञ्चालनमा ल्याइएको प्रहरीले जनाएको छ।
यात्रुहरूलाई विशेष सतर्कता अपनाउन आग्रह
मौसमविद्हरूले आगामी केही दिन पनि देशका धेरै स्थानमा भारी वर्षाको सम्भावना औँल्याएका छन्।
यससँगै पहिरो, बाढी, गेग्रान बहाव तथा सडक कटानको जोखिम अझै उच्च रहने अनुमान गरिएको छ।
नेपाल प्रहरीले यात्रा गर्नुअघि सम्बन्धित जिल्ला प्रहरी कार्यालय, ट्राफिक प्रहरी वा सडक विभागबाट सडकको अवस्था बुझ्न, जोखिमपूर्ण क्षेत्रमा अनावश्यक यात्रा नगर्न र मौसमसम्बन्धी आधिकारिक सूचनालाई निरन्तर पछ्याउन सबैलाई आग्रह गरेको छ।
मनसुनका कारण सडक सञ्जालमा देखिएको अवरोधले यात्रु, मालवाहक सवारी, पर्यटन र दैनिक आपूर्तिमा समेत असर पर्ने देखिएकाले आवश्यक सतर्कता अपनाउन सरोकारवाला निकायले अनुरोध गरेका छन्।
