२०८० फागुन ११ शुक्रवार | Friday, Feb 23 2024

न्यूजील्याण्डका नयाँ प्रधानमन्त्रीमा चवालीस वर्षीय क्रिस हिप्किन्स

एजेन्सी, न्यूजील्याण्डका नयाँ प्रधानमन्त्रीमा चवालीस वर्षीय क्रिस हिप्किन्सले २० वर्षदेखिको आफ्नो साथी आर्डनलाई प्रतिस्थापन गर्दै प्रधानमन्त्रीको पद तथा गोपनीयताको शपथ लिएका छन्।

राष्ट्रको कार्यकारी प्रमुखको उत्तरदायित्व औपचारिकरूपमा बहन गरेसँगै उनले आफूमाथि सबैभन्दा ठूलो दायित्व आएको बताए ।

भावी चुनौती सामना गर्न आफू उत्साहित र आल्हादित भएको पनि उनले बताए । स्पष्टवक्ता हिप्किन्स कोभिड–१९ नियन्त्रणका शिल्पकार सहृदयी राजनीतिज्ञका रूपमा परिचित छन् ।

देशको सर्वोच्च पदमा पुग्न लागेको खबर सार्वजनिक हुँदा गत हप्ता उनले पत्रकारहरूलाई आफूसँग देशवासी परिचित रहेका तथा उनीहरूका कमजोरीप्रति ममता र हाँस्नसक्ने आफ्नो स्वभाव भएको बताएका थिए ।

विद्यार्थी राजनीतिदेखि नै उनी जनतामाझ प्रिय थिए । सन् १९९० मा विश्वविद्यालयको प्रस्तावित सुधारका कार्यक्रमप्रति असहमति जनाउँदै त्यसको विरोध गर्दा उनी पक्राउ परेका थिए ।

राजनीतिक टिप्पणीकर्ता जोसे पगानी १४ वर्ष सत्ता र प्रतिपक्षमा बसेका हिप्किन्सलाई ‘व्यावहारिक, आकर्षक, कठोर एवम् सक्षम’ मान्छन् ।

लेबर पार्टीको घट्दो लोकप्रियताका बीच बढ्दो मन्दी तथा पुनः आक्रामक बन्नसक्ने कन्जरभेटिभ विपक्षीलाई व्यवस्थापन गर्नुपर्ने गहन दायित्वमा पुगेका छन् ।

प्रधानमन्त्री हिप्किन्सले करिब दुई वर्ष कोभिड नियन्त्रणका निम्ति मन्त्रीका रूपमा निर्वाह गरेको भूमिकाको सर्वत्र प्रशंसा भएको थियो ।

श्रमिकक परिवारको पृष्ठभूमिका नयाँ प्रधानमन्त्रीले सुरक्षा र शिक्षाको जिम्मेवारी सम्हालेर आफ्नो राजनीतिक यात्रालाई निरन्तर अघि बढाएक र सफलता पनि हासिल गरे ।

तुलनात्मकरूपमा आफू निष्कपट, सबैलाई समान अवसर दिनुपर्ने समावेशी चरित्रको व्यक्ति भएको बताउँने उनी आफ्ना मातापिताले आफ्नो र आफ्ना दाजुको पालनपोषण एवम् शिक्षाका निम्ति कठोर परिश्रम गरेको उल्लेख गर्छन् ।

उनको खानपानले आफ्ना साथीभाइ र समकक्षीको ध्यान आकर्षित गरेको प्रसङ्ग पनि रोचक छ । एकपटक हिप्किन्सका हाकिमले ‘हिप्किन्सलाई ससेज र डायट कोक भएपुग्छ’ भनेका थिए ।

प्रधामन्त्रीका सम्भावित उम्मेदवार ठानिएकी न्यायमन्त्री किरी अलान हिप्किन्सलाई अविश्वसनीयरूपमा सबल नेता मान्छिन् ।

देशलाई हाँक्नसक्ने क्षमता भएको नेताका रूपमा उनी हिप्किन्सलाई चित्रण गटिर्छन्। विगतमा उनले गरेका कामको समीक्षा गर्दै न्यायमन्त्रीले त्यसो भनेकी हुन्।

साइकल चलाउन र फूलबारीमा काम गर्न रुचाउँने हिप्किन्सले संसद् जाँदा आफूले लगाउने लुगाले वस्त्रप्रतिको आफ्नो चेतना कमजोर भएको पत्रकारमाझ स्वीकार गरेका थिए ।

प्रधानमन्त्री आर्डनले पदत्यागको घोषणा गरेपछि पत्रकारमाझ प्रस्तुत हुँदा उनले रङ खुईलिएको टोपी, कालो चस्मा र शरीरमा टम्म नमिलेको सर्ट लगाएका थिए।

राजधानी वेलिङ्टनस्थित भिक्टोरिया विश्वविद्यालयमा अपराधशास्त्र र राजनीति अध्ययन गरेका नवनियुक्त प्रधानमन्त्रीले औद्योगिक प्रशिक्षण क्षेत्रमा केही समय काम गरेका थिए ।

सन् २००८ मा संसद् सदस्य हुनुअघि उनी शिक्षामन्त्रीका वरिष्ठ सल्लाहकार तथा पूर्व प्रधानमन्त्री हेलेन क्लार्कका वरिष्ठ सल्लाहकार रहेका थिए।