काठमाण्डू, समाचार संकलन गर्न पत्रकार लगेर रकम असुल्ने संस्था गाउँ पर्यटन प्रवर्धन मञ्च नेपाल ( भिटोफ नेपाल ) ले २७ औं अधिवेशनको अवसर पारेर पत्रकार तथा बिभिन्न क्षेत्रका ब्यक्तिलाई सम्मान गरेको छ ।
महाधिबेशनको अवसर पारेर पर्यटन क्षेत्रमा लामो समयदेखि क्रियाशील पत्रकार कुमारप्रसाद चौंलागाई सहित निशेष थापा, बाबूराम कार्की, राधा ढुङ्गाना, तारालाल धरेल, गोपाल थापा, बोधराज भण्डारी, , माधव घिमिरे ‘अटल’ लगायतलाई भिटोफ नेपाल उन्नयनमा विभिन्न किसिमका योगदान गरे वापत सम्मान गरिएको थियो ।
काठमाडौंको नयाँ बजारमा भएको अधिबेशनले नयाँ समिति पनि चयन गरेको छ ।
हरिशरण थपलियाको अध्यक्षतामा नवनिर्वाचित समितिमा प्रथम उपाध्यक्ष मनहरि दाहाल, द्वितीय उपाध्यक्ष विनोद वस्ती, महासचिव अर्जुन भट्ट, सचिव सुरेन्द्र भट्ट, कोषाध्यक्ष इन्दिरा रिमाल न्यौपाने तथा सह-कोषाध्यक्ष नारायण सोडारी चयन भएका थिए ।
समितिका सदस्यहरुमा प्रतीपकुमार तामाङ, सुनिता पौडेल दवाडी, विनोद ढकाल र सुनिता अधिकारी न्यौपाने निर्वाचित भएका थिए ।
राष्ट्रियसभाका अध्यक्ष नारायणप्रसाद दाहालले अधिबेशनको उदघाटन गर्दै नेपालको पर्यटन उन्नयनमा सरकारको तर्फबाट यथाशक्य सहयोग गर्ने वाचा बताए ।
अभ्यक्ष दाहालले पर्यटन क्षेत्रलाई आफूले नजिकबाट नियालेको जिकिर गर्दै पर्यटनलाई हरेक नेपालीले मनबाटै माया गर्नुपर्ने जिकिर गरे ।
प्रदेश संस्कृति तथा पर्यटन सचिव दीपेन्द्र सुवेदीले तेह्रौ अधिवेशनको भव्य सफलताको कामना गर्दै बागमती प्रदेशले पर्यटन क्षेत्रको विविधीकरण र सुधारलाई उच्च प्राथमिकता दिएको दावी गरे ।
सचिव सुवेदीले प्याराडाइज एपमार्फत पर्यटन प्रवर्धनको कामलाई अघि बढाएको बताउँदै सिन्धुपाल्चोक जिल्लाको बलेफीमा राफ्टिङ स्कूल खोल्ने सम्पूर्ण तयारी पूरा भएको जानकारी दिए ।
नेपाल पर्यटन बोर्डका उपाध्यक्ष रामप्रसाद सापकोटाले नयाँ कार्यसमितिले पनि उत्साह सञ्चार गर्दै प्रवर्धन गर्न आग्रह गरे ।
उपाध्यक्ष सापकोटाले नेपालको पर्यटन प्रर्वधन गर्न भिटोभको योगदानको मुक्तकण्ठले प्रशंसा गरे ।
टानका अध्यक्ष सागर पाण्डेले पर्यटन क्षेत्रका विभिन्न समस्या हल गर्ने काममा सहकार्य गर्न तत्पर रहेको जनाउ दिँदै गाउँमा पर्यटक पठाउने र घरबास व्यवसाय टिकाउने काममा सरकारले दिएको दुईदिने बिदाले परोक्ष प्रवर्धन गर्ने बताएका थिए ।
दश वर्षमा एक करोड विदेशी पर्यटक भित्र्याउने सरकारको योजना कार्यान्वयन गर्न आफूहरू तम्तयार रहेको अध्यक्ष पाण्डेको भनाइ थियो ।
भिटोफ-नेपालका अध्यक्ष शकुन्तला देवकोटाले घरबास विकास र बजारीकरणमा उल्लेख्य योगदान गरेको बताउँदै गन्तव्य गाउँ घोषणा गर्ने मात्र नभई रोपाइँ कार्यक्रमलाई निरन्तरता दिने काम भएको बताइन ।
ग्रामीण पर्यटनलाई पर्यटनको मेरुदण्ड बनाउन प्रयत्न गरेको दाबी गर्दै अध्यक्ष देवकोटाले प्रमुख अतिथि लगायत अतिथिहरूलाई धन्यवाद ज्ञापन गरिन ।
कार्यक्रममा २०८२ मा घोषित गन्तव्य गाउँका प्रतिनिधिलाई प्रमाणपत्र अर्पण गरिएको थियो । कार्यक्रममा २०८२ मा घोषित गन्तव्य गाउँका प्रतिनिधिलाई प्रमाणपत्र गरिएको थियो ।
गत बर्ष गाउँ पर्यटन प्रवर्धन मञ्च नेपाल (भिटोफ नेपाल) ले रसुवाको जिवजिबेमा धान दिवसको अवसर पारेर पत्रकार सहित बिभिन्न क्षेत्रमा ब्यतित्वहरुलाई लगेर रोपाईं महोत्सव गरेको थियो ।
बर्षै पिच्छे भिटोभले आयोेजना गर्ने रोपाईं महोत्सबमा पत्रकारलाई समाचार संकलनका लागि बोलाएर पत्रकारबाटै रकम संकलन गरिएको थियो ।
संस्थाकै अध्यक्ष देवकोटा आफैंले पत्रकारसहित सबै सहभागीसित रकम संकलन गरेकी थिइन । अध्यक्ष देवकोटाको सो कार्यको संस्थाकै अन्य पदाधिकारीलेसमेत आयोचना गरेपछि पत्रकारबाट लिएको रकम भने फिर्ता गरिएको थियो ।
