काठमाण्डू, निर्वाचन आयोगका आयुक्तका लागि सिफारिस भएका दुई प्रस्तावित उम्मेदवारको संसदीय सुनुवाइ आज हुने भएको छ।
संघीय संसद्अन्तर्गतको संसदीय सुनुवाइ समितिको बैठकमा निर्वाचन आयुक्तका लागि प्रस्तावित गुरुप्रसाद वाग्ले र डा. राजीव सुब्बा को योग्यता, अनुभव र कार्ययोजनाबारे सुनुवाइ गरिने कार्यसूची रहेको छ।
संवैधानिक परिषद्को असार १९ गते बसेको बैठकले प्रमुख निर्वाचन आयुक्तमा मानबहादुर कार्की तथा निर्वाचन आयुक्तमा गुरुप्रसाद वाग्ले र डा. राजीव सुब्बाको नाम सिफारिस गरेको थियो।
संवैधानिक व्यवस्थाअनुसार संसदीय सुनुवाइ समितिले उम्मेदवारमाथि आवश्यक छलफल र मूल्याङ्कन गरी राय दिएपछि मात्रै राष्ट्रपतिले प्रमुख निर्वाचन आयुक्त र निर्वाचन आयुक्तहरूको नियुक्ति गर्ने व्यवस्था छ।
यसअघि समितिले प्रस्तावित उम्मेदवारविरुद्ध सार्वजनिक रूपमा उजुरी आह्वान गरेको थियो।
प्राप्त उजुरी, उम्मेदवारको योग्यता, कार्यअनुभव तथा सुनुवाइका क्रममा प्रस्तुत हुने धारणा र जवाफका आधारमा समितिले आफ्नो निर्णय सार्वजनिक गर्नेछ।
निर्वाचन आयोग संवैधानिक निकाय भएकाले आयुक्तहरूको नियुक्तिलाई निष्पक्ष, पारदर्शी र विश्वसनीय निर्वाचन प्रणालीसँग जोडेर हेरिने गरिन्छ।
त्यसैले आजको संसदीय सुनुवाइलाई आयोगको भावी नेतृत्व चयन प्रक्रियाको महत्वपूर्ण चरणका रूपमा हेरिएको छ।
