एजेन्सी, विश्वकप फुटबल २०२६ अन्तर्गत राउन्ड अफ ३२ मा बेल्जियमले अविश्वसनीय पुनरागमन गर्दै सेनेगललाई ३–२ ले पराजित गरेको छ।
नेपाली समयअनुसार बिहीबार बिहान सम्पन्न खेलमा निर्धारित समय सकिन केही मिनेट मात्र बाँकी रहँदा दुई गोलले पछि परेको अवस्थाबाट खेल उल्टाउँदै बेल्जियम अन्तिम १६ मा प्रवेश गर्न सफल भयो।
निर्धारित समयको ८६औँ मिनेटसम्म २–० ले पछि परेको बेल्जियमले चमत्कारिक पुनरागमन गर्दै लगातार दुई गोल गर्यो र खेललाई अतिरिक्त समयमा पुर्यायो।
त्यसपछि अतिरिक्त समयको इन्जुरी समयको अन्तिम क्षणमा प्राप्त पेनाल्टीलाई सदुपयोग गर्दै विजयी गोल गरेपछि बेल्जियमले विश्वकप इतिहासकै सबैभन्दा रोमाञ्चक नकआउट जितमध्ये एक दर्ता गर्यो।
यो जितसँगै विश्वकपको नकआउट चरणमा दुई वा सोभन्दा बढी गोलले पछि परेको अवस्थाबाट पुनरागमन गर्दै अघिल्लो चरणमा पुगेको टोलीका रूपमा बेल्जियम दोस्रो पटक इतिहासमा दर्ज भएको छ।
यसअघि सन् २०१८ को विश्वकपमा पनि बेल्जियमले जापानविरुद्ध २–० ले पछि परेको खेल ३–२ ले जित्दै क्वार्टरफाइनल यात्रा तय गरेको थियो।
सन् २०१८ को विश्वकपमा बेल्जियमलाई तेस्रो स्थान दिलाउने अनुभवी खेलाडीहरूले नै यसपटक पनि टोलीलाई संकटबाट उकासे।
दोस्रो हाफमा वैकल्पिक खेलाडीका रूपमा मैदान प्रवेश गरेका रोमेलु लुकाकुले ८६औँ मिनेटमा गोल गर्दै आशा जगाए।
त्यसको तीन मिनेटपछि युरी टिलेमान्सले बराबरी गोल गरेपछि खेल अतिरिक्त समयमा पुगेको थियो।
खेल पेनाल्टी सुटआउटतर्फ जाने तयारीमा रहेका बेला अतिरिक्त समयको इन्जुरी समयको पाँचौँ मिनेटमा टिलेमान्समाथि पेनाल्टी क्षेत्रभित्र फल भयो।
भिडियो सहायक रेफ्री (VAR मार्फत लामो समीक्षा गरेपछि रेफ्रीले बेल्जियमलाई पेनाल्टी दिएका थिए।
त्यसपछि टिलेमान्सले नै पेनाल्टीलाई गोलमा परिणत गर्दै टोलीलाई ऐतिहासिक जीत दिलाए।
उक्त गोल विश्वकपको नकआउट चरणमा सबैभन्दा ढिलो समयमा भएको निर्णायक गोलमध्ये एक बनेको छ।
दुई पटकको विश्वविजेता फ्रान्स र एर्लिङ हालान्डको नर्वे रहेको कठिन समूहबाट उत्कृष्ट तेस्रो टोलीका रूपमा नकआउट चरण पुगेको सेनेगलका लागि यो हार निकै निराशाजनक बन्यो।
पहिलो रोजाइका गोलरक्षक एडुआर्ड मेन्डी चोटका कारण अनुपस्थित रहे पनि अफ्रिकी टोलीले शुरुवातदेखि नै उत्कृष्ट प्रदर्शन गरेको थियो।
खेलको २५औँ मिनेटमा हबिब डियाराले गोल गर्दै सेनेगललाई अग्रता दिलाए।
दोस्रो हाफको ५१औँ मिनेटमा इस्माइला सारले अर्को आकर्षक गोल थपेपछि सेनेगल २–० को बलियो अवस्थामा पुगेको थियो।
जारी विश्वकपमा सारको यो चौथो गोल थियो। त्यसपछि बेल्जियमका गोलरक्षक थिबाउट कोर्टुवाले लगातार उत्कृष्ट बचाउ गर्दै टोलीलाई थप गोल खानबाट जोगाएका थिए।
५६औँ मिनेटमा बेल्जियमले केभिन डे ब्रुइने र जेरेमी डोकुलाई बाहिर निकालेर रणनीतिक परिवर्तन गरेको थियो, जसले खेलको दिशा परिवर्तन गर्न महत्त्वपूर्ण भूमिका खेलेको मानिएको छ।
निर्णायक पेनाल्टी दिइएपछि सेनेगलका खेलाडीहरूले रेफ्रीको निर्णयप्रति तीव्र असन्तुष्टि जनाएका थिए।
डिफेन्डर पाथे सिसले विरोधस्वरूप पेनाल्टी स्पटमै सुतेर प्रदर्शन गरेका थिए।
टिलेमान्स प्रहारका लागि तयार भएपछि मात्र उनी त्यहाँबाट हटेका थिए।
यस ऐतिहासिक जितसँगै बेल्जियम पछिल्ला चार विश्वकपमध्ये तेस्रो पटक अन्तिम १६ मा पुगेको छ।
सन् २०१४ मा क्वार्टरफाइनल र २०१८ मा सेमिफाइनलसम्म पुगेको बेल्जियम २०२२ को कतार विश्वकपमा भने समूह चरणबाटै बाहिरिएको थियो।
अब बेल्जियमले क्वार्टरफाइनल प्रवेशका लागि आगामी सोमबार अमेरिका वा बोस्निया एन्ड हर्जगोभिनामध्ये एकसँग प्रतिस्पर्धा गर्नेछ।
