काठमाण्डौ, सम्पत्ति शुद्धीकरण विभागले नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवाका छोरा जयवीर देउवालाई सम्पत्ति शुद्धीकरणसम्बन्धी अनुसन्धानका क्रममा सात दिनभित्र उपस्थित हुन निर्देशन दिँदै औपचारिक पुर्जी जारी गरेको छ।
विभागले अनुसन्धानलाई अगाडि बढाउन आवश्यक बयान, कागजात र अन्य विवरण संकलन गर्ने उद्देश्यले उनलाई उपस्थित हुन भनेको हो।
विभागका अनुसार जारी गरिएको पुर्जीमा तोकिएको अवधिभित्र उपस्थित भएर अनुसन्धानमा आवश्यक सहयोग गर्न भनिएको छ।
उक्त सूचना जयवीर देउवाको काठमाडौंको बुढानीलकण्ठस्थित निवासमा समेत टाँस गरिएको जनाइएको छ।
यसअघि यही अनुसन्धानको सिलसिलामा विभागले पूर्वप्रधानमन्त्री शेरबहादुर देउवा र उनकी पत्नी आरजु राणा देउवालाई पनि उपस्थित हुन पत्राचार गरेको थियो।
स्रोतका अनुसार देउवा दम्पतीले साउन मसान्तभित्र विभागमा उपस्थित भएर आवश्यक बयान र विवरण उपलब्ध गराउने जानकारी दिएका छन्।
विभागले अनुसन्धानको विषयवस्तुबारे औपचारिक रूपमा कुनै जानकारी सार्वजनिक गरेको छैन।
अनुसन्धान प्रभावित हुन सक्ने भएकाले छानबिनको प्रकृति, सम्बन्धित कारोबार वा अनुसन्धानको आधारबारे हालसम्म मौनता अपनाइएको छ।
सम्पत्ति शुद्धीकरणसम्बन्धी अनुसन्धानका क्रममा सामान्यतया व्यक्तिको आम्दानीको स्रोत, सम्पत्तिको विवरण, बैंकिङ कारोबार, लगानी, वित्तीय अभिलेख तथा अन्य आर्थिक गतिविधिको परीक्षण गरिने कानुनी व्यवस्था रहेको छ।
आवश्यक परे सम्बन्धित व्यक्तिसँग बयान लिने, थप कागजात माग गर्ने तथा अन्य सरकारी निकायसँग समन्वय गरेर प्रमाण संकलन गर्ने प्रक्रिया पनि अपनाइन्छ।
विभागले अनुसन्धान अझै प्रारम्भिक चरणमै रहेको संकेत दिएको छ। त्यसैले अनुसन्धानबाट प्राप्त हुने प्रमाण, बयान र अन्य तथ्यका आधारमा मात्रै आगामी कानूनी प्रक्रिया अघि बढ्ने वा नबढ्ने विषय टुंगो लाग्ने जनाइएको छ।
यस प्रकरणले राजनीतिक वृत्तमा पनि चासो बढाएको छ। यद्यपि हालसम्म विभागले कसैलाई दोषी ठहर गरेको वा कुनै निष्कर्षमा पुगेको जनाएको छैन।
अनुसन्धान प्रक्रिया जारी रहेकाले सम्बन्धित पक्षको बयान, कागजात र प्रमाणका आधारमा मात्रै अन्तिम निष्कर्ष निकालिने अपेक्षा गरिएको छ।
