काठमाण्डू, नेकपा (एमाले) का अध्यक्ष केपी ओलीसँग भेट गर्न पूर्वराष्ट्रपति विद्यादेवी भण्डारी एमाले पार्टी कार्यालय च्यासल पुगेकी छन् ।
आइतबार दिउँसो एमाले पार्टी कार्यालय च्यासल पुगेर पूर्वराष्ट्रपति भण्डारीले एमाले अध्यक्ष ओलीसँग भेट गर्न लागेकी हुन् ।
भेटमा समसामयिक राजनीतिक विषयमा छलफल हुने एमाले प्रचार विभाग प्रमुख राजेन्द्र गौतमले जानकारी दिए ।
एमाले पोलिटब्यूरो बैठकले शनिबार परिमार्जनसहित पार्टीको विधान मस्यौदालाई अनुमोदन गरेको छ ।
पूर्वराष्ट्रपति भण्डारीको सदस्यता नवीकरणको विषय र उनको सक्रिय राजनीतिमा आउने विषयलाई लिएर पार्टीको बैठकमा गम्भीर छलफल भएपछि उनले अध्यक्ष ओलीसँग भेट गर्न लागेकी हुन् ।
आगामी केन्द्रीय कार्य समितिको बैठकले सो विषयलाई छलफलसहित अनुमोदन गर्ने नेताहरुको भनाइ छ ।
पूर्वराष्ट्रपति भण्डारीका प्रमुख स्वकीय राजकुमार राईले पार्टीको आन्तरिक विषय र समसामयिक राजनीतिक विषयमा छलफल हुने जानकारी दिए ।
पार्टी उपाध्यक्ष विष्णुप्रसाद पौडेलद्वारा प्रस्तुत विधान मस्यौदामा उमेर हद ७० वर्ष र दुई कार्यकाल व्यवस्थालाई खारेज प्रस्तावलाई पोलिटब्यूरो बैठकले अनुमोदन गरिसकेको छ ।
