एजेन्सी, इरानमाथि अमेरिकाले नयाँ चरणको हवाई आक्रमण शुरु गरेपछि खाडी क्षेत्रका मुलुकहरूले सुरक्षा सतर्कता उच्चस्तरमा पुर्याएका छन्।
सम्भावित सुरक्षा जोखिमलाई ध्यानमा राख्दै कतारले आपतकालीन सुरक्षा चेतावनी जारी गरेको छ भने बहराइन र कुवेतमा पनि चेतावनीका साइरन बजाइएका छन्।
क्षेत्रीय तनाव तीव्र बन्दै गएपछि खाडी मुलुकहरूले आफ्ना नागरिक र विदेशी बासिन्दालाई अत्यधिक सावधानी अपनाउन आग्रह गरेका छन्।
सरकारी निकायहरूले अनावश्यक रूपमा बाहिर ननिस्कन, सुरक्षित स्थानमै बस्न र सुरक्षा निकायबाट जारी हुने आधिकारिक सूचनाको पालना गर्न निर्देशन दिएका छन्।
कतारको गृह मन्त्रालयले मोबाइल सन्देशमार्फत नागरिक तथा बासिन्दालाई सुरक्षा जोखिमको स्तर उच्च रहेको जानकारी गराउँदै घरभित्रै वा अन्य सुरक्षित स्थानमा बस्न आग्रह गरेको छ।
मन्त्रालयले झ्याल, ढोका तथा सिसाले बनेका संरचनाबाट टाढा रहन र आपतकालीन अवस्थाको अन्त्य नभएसम्म सतर्कता कायम राख्न अनुरोध गरेको छ।
सरकारी निकायहरूले अफवाहमा विश्वास नगर्न र आधिकारिक माध्यमबाट जारी हुने सूचनामात्रै पछ्याउन पनि आग्रह गरेका छन्।
आवश्यक परे आपतकालीन सेवासँग तत्काल सम्पर्क गर्न सकिने व्यवस्था पनि गरिएको जनाइएको छ।
यस्तै, बहराइनको गृह मन्त्रालयले पनि देशभर चेतावनीका साइरन बजाइएको पुष्टि गर्दै नागरिकलाई शान्त रहन र आफू नजिकको सुरक्षित आश्रयस्थलमा जान निर्देशन दिएको छ।
मन्त्रालयले सुरक्षा निकायको निर्देशन पालना गर्न र अनावश्यक आवागमन नगर्न अनुरोध गरेको छ।
कुवेतले पनि सम्भावित सुरक्षा जोखिमलाई ध्यानमा राख्दै देशका विभिन्न क्षेत्रमा चेतावनी प्रणाली सक्रिय पारेको छ।
सरकारी समाचार संस्था ‘कुना’का अनुसार राष्ट्रिय सुरक्षा संयन्त्रलाई उच्च सतर्क अवस्थामा राखिएको छ भने आवश्यक सुरक्षा तयारीसमेत बढाइएको छ।
खाडी क्षेत्रमा सुरक्षा सतर्कता बढ्नुको मुख्य कारण बुधबार अबेर राति दक्षिण तथा दक्षिण–पूर्वी इरानका विभिन्न रणनीतिक क्षेत्रलाई लक्षित गरी अमेरिकाले गरेको नयाँ हवाई आक्रमण हो।
अमेरिकी कारबाहीपछि क्षेत्रीय सुरक्षा अवस्था थप संवेदनशील बनेको अन्तर्राष्ट्रिय सञ्चारमाध्यमहरूले जनाएका छन्।
अमेरिकी सेनाको सेन्ट्रल कमान्ड (सेन्टकम) ले जारी गरेको वक्तव्यमा स्ट्रेट अफ होर्मुज हुँदै हुने अन्तर्राष्ट्रिय समुद्री आवागमनलाई जोखिममा पार्न सक्ने इरानी क्षमतालाई कमजोर बनाउने उद्देश्यले सैन्य कारबाही गरिएको उल्लेख गरिएको छ।
स्ट्रेट अफ होर्मुज विश्वको सबैभन्दा महत्वपूर्ण ऊर्जा ढुवानी मार्गमध्ये एक मानिन्छ।
विश्वभर निर्यात हुने ठूलो परिमाणको कच्चा तेल र प्राकृतिक ग्यास यही समुद्री मार्गबाट ओसारपसार हुने भएकाले यहाँ उत्पन्न हुने कुनै पनि सुरक्षा संकटले अन्तर्राष्ट्रिय ऊर्जा बजार, विश्व व्यापार तथा क्षेत्रीय सुरक्षामा प्रत्यक्ष प्रभाव पार्ने विश्लेषण गरिएको छ।
पछिल्ला घटनाक्रमसँगै खाडी क्षेत्रमा सैन्य गतिविधि बढ्दै गएको छ भने सम्भावित थप आक्रमण वा प्रतिआक्रमणको जोखिमलाई ध्यानमा राख्दै विभिन्न मुलुकले सुरक्षा व्यवस्था कडा बनाएका छन्।
अन्तर्राष्ट्रिय समुदायले पनि तनाव थप नबढाउन संयमता अपनाउन र कूटनीतिक माध्यमबाट समाधान खोज्न सम्बन्धित पक्षहरूसँग आग्रह गरिरहेको छ।
