एजेन्सी, कप्तान क्रिस्टियानो रोनाल्डोको कीर्तिमानी गोल र इन्जुरी समयको अन्तिम मिनेटमा गोन्सालो रामोसले गरेको निर्णायक गोलको मद्दतमा पोर्चुगल फिफा विश्वकप २०२६ को अन्तिम १६ मा प्रवेश गरेको छ।
बिहीबार बिहान सम्पन्न रोमाञ्चक नकआउट खेलमा क्रोएसियालाई २–१ ले पराजित गर्दै पोर्चुगलले अर्को चरणमा स्थान सुरक्षित गरेको हो।
यस जितसँगै पोर्चुगलले अन्तिम १६ मा स्पेनसँग प्रतिस्पर्धा गर्ने भएको छ। पराजित क्रोएसियाको भने विश्वकप यात्रा यही चरणमा समाप्त भएको छ।
खेलको पहिलो हाफ दुवै टोलीले गोलरहित बराबरीमा टुंग्याए पनि दोस्रो हाफ अत्यन्त प्रतिस्पर्धात्मक र नाटकीय बन्यो।
५३औँ मिनेटमा जोसिप स्टानिसिचको पासमा इभान पेरिसिचले उत्कृष्ट बायाँ खुट्टे प्रहार गर्दै क्रोएसियालाई अग्रता दिलाएका थिए।
पछि परेको पोर्चुगलले त्यसपछि लगातार दबाब सिर्जना गर्यो।
राफेल लियाओको शक्तिशाली प्रहार गोलपोस्टमा लागेर फर्कियो भने ६०औँ मिनेटमा क्रिस्टियानो रोनाल्डोले गरेको गोल भिडियो सहायक रेफ्री (भीएआर) ले अफसाइड ठहर गर्दै रद्द गरिदियो।
खेलको दिशा बदल्ने प्रयासस्वरूप प्रशिक्षक रोबर्टो मार्टिनेजले एकैपटक चार खेलाडी परिवर्तन गरे, जसको प्रभाव तत्काल देखियो।
६८औँ मिनेटमा रेनाटो भेइगालाई पेनाल्टी क्षेत्रमा लडाइएपछि पोर्चुगलले पेनाल्टीको अवसर पायो।
कप्तान रोनाल्डोले उक्त अवसरलाई सहजै गोलमा परिणत गर्दै खेललाई १–१ को बराबरीमा ल्याए।
यो गोल रोनाल्डोका लागि ऐतिहासिक बन्यो। उनले विश्वकपको नकआउट चरणमा झन्डै दुई दशकपछि गोल गर्दै आफ्नो लामो गोल खडेरी अन्त्य गरे।
४१ वर्षको उमेरमा विश्वकप नकआउट चरणमा गोल गर्ने उनी इतिहासकै सबैभन्दा पाका खेलाडीसमेत बने।
यससँगै विश्वकपमा उनको कुल गोल संख्या ११ पुगेको छ, जसले उनलाई प्रतियोगिताको सर्वाधिक गोलकर्ताको सूचीमा नवौँ स्थानमा पुर्याएको छ।
साथै उनले खेलेको यो २६औँ विश्वकप खेल थियो, जुन केवल लियोनेल मेस्सीपछि दोस्रो धेरै हो।
खेल अतिरिक्त समयमा धकेलिने संकेत देखिइरहेका बेला इन्जुरी समयको चौथो मिनेटमा गोन्सालो रामोसले निर्णायक गोल गरे।
उनको गोलसँगै पोर्चुगलले २–१ को रोमाञ्चक जीत दर्ता गर्दै अन्तिम १६ को यात्रा तय गर्यो।
खेलको अन्तिम क्षण भने निकै विवादास्पद रह्यो। इन्जुरी समयमै क्रोएसियाका मारियो पासालिचले गोल गर्दै खेल बराबरीमा ल्याएको जस्तो देखिए पनि भीएआरले अफसाइड ठहर गरेपछि गोलले मान्यता पाएन।
निर्णयप्रति असन्तुष्ट क्रोएसियाली समर्थकहरूले मैदानमा बोतल प्रहार गर्दै र सिठ्ठी बजाएर विरोध जनाएका थिए।
विवादका बीच अन्तिम सिटी बज्दा पोर्चुगलले कठिन जित हात पार्दै विश्वकप यात्रालाई निरन्तरता दियो।
