काठमाण्डू, लगातारको वर्षासँगै आएको बाढी र पहिरोका कारण देशका विभिन्न क्षेत्रमा रहेका प्रमुख राजमार्गहरू प्रभावित भएका छन्।
बुधबार पनि देशभरका आठ स्थानमा मुख्य सडक तथा राजमार्ग पूर्ण रूपमा अवरुद्ध हुँदा यात्रु र सवारीसाधन आवतजावतमा समस्या भएको छ।
नेपाल प्रहरीले बुधबार बिहान सार्वजनिक गरेको पछिल्लो विवरणअनुसार कोशी, बागमती, गण्डकी र कर्णाली प्रदेशका विभिन्न सडकखण्डमा पहिरो खस्नु तथा बाढीले सडक बगाउँदा यातायात सेवा ठप्प भएको हो।
कोशी प्रदेशको इलामस्थित मेची राजमार्ग पहिरोका कारण अवरुद्ध भएको छ।
बागमती प्रदेशमा सिन्धुली र काभ्रे भएर जाने बीपी राजमार्गका विभिन्न स्थानमा बाढी र पहिरोको जोखिम बढेपछि सवारी सञ्चालन प्रभावित भएको छ।
त्यस्तै सिन्धुपाल्चोकको अरनिको राजमार्ग पनि पहिरोका कारण पूर्ण रूपमा बन्द रहेको प्रहरीले जनाएको छ।
मकवानपुरको कान्तिलोकपथ पनि पहिरोका कारण अवरुद्ध हुँदा काठमाडौं–हेटौंडा जोड्ने वैकल्पिक मार्गसमेत प्रभावित बनेको छ।
गण्डकी प्रदेशमा बागलुङस्थित कालीगण्डकी करिडोर पहिरोका कारण बन्द भएको छ भने गोरखाको आरुघाट–माछिखोला सडकखण्ड पनि बाढी र पहिरोका कारण सञ्चालन हुन सकेको छैन।
यस्तै, कर्णाली प्रदेशको जाजरकोट–डोल्पा जोड्ने भेरी करिडोर सडक पनि विभिन्न स्थानमा पहिरो खस्दा पूर्ण रूपमा अवरुद्ध भएको प्रहरीले जनाएको छ।
यसले डोल्पासहित हिमाली जिल्लासँगको सडक सम्पर्क प्रभावित भएको छ।
जल तथा मौसम विज्ञान विभागले अझै केही दिन देशका अधिकांश क्षेत्रमा मनसुन सक्रिय रहने र भारी वर्षाको सम्भावना रहेको जनाएको छ।
यससँगै नदी–खोलामा पानीको बहाव बढ्ने, नयाँ पहिरो खस्ने तथा सडक थप अवरुद्ध हुन सक्ने जोखिम पनि कायम रहेको छ।
नेपाल प्रहरीले सर्वसाधारणलाई यात्रामा निस्कनुअघि सम्बन्धित सडकको पछिल्लो अवस्था बुझ्न, वैकल्पिक मार्गको प्रयोग गर्न तथा वर्षाका बेला जोखिमयुक्त क्षेत्रको यात्रा सकेसम्म टार्न आग्रह गरेको छ।
साथै स्थानीय प्रशासन, ट्राफिक प्रहरी र सम्बन्धित निकायले जारी गर्ने सूचना तथा निर्देशनको पालना गर्न पनि अनुरोध गरेको छ।
मनसुनजन्य विपद्का कारण राजमार्गहरू पटक–पटक अवरुद्ध भइरहेकाले लामो दूरीको यात्रा गर्ने यात्रु, सार्वजनिक यातायात सञ्चालक तथा ढुवानी व्यवसायीलाई विशेष सतर्कता अपनाउन विज्ञहरूले सुझाव दिएका छन्।
