काठमाण्डू, प्रतिनिधिसभा सदस्य विश्वप्रकाश शर्माले उपप्रधान तथा गृहमन्त्री रवी लामिछानेले ‘जीवी राईको लोकेसन पत्ता लागिसक्यो’ भनेर दिएको अभिव्यक्तिको औचित्यप्रति आशंका व्यक्ति गरेका छन् ।
आइतबार प्रतिनिधि सभाको आकस्मिक समयमा बोल्दै नेपाली कांग्रेसका महामन्त्री समेत रहेका शर्माले भने, ‘लोकेसन पत्ता लागिसक्यो भनेको जीवी राईलाई भगाउनलाई हो ? माइकबाट फुकेर लोकेसन पत्ता लागिसक्यो भनेर स्टन्डबाजी गर्ने ? कि सरकार चाँडै नै जीबी राईलाई हाजिर गराउँदैछ ?’
मलेसियाका गृहमन्त्रीले नेपालका गृहमन्त्रीसँग कुरा गरेको भनेर गोपनीयता नखोलेको तर नेपालका गृहमन्त्री लामिछानेले भने गोपनीयता खोलेको बताए ।
‘हाम्रा गृहमन्त्रीले राजपत्रमा छाप्नबाहेक मिडियामा बिस्कुन लगाउनुहुन्छ’, उनले भने ।
लोकेसन पत्ता लागिसकेको भए चार दिन बित्दासमेत किन पक्राउ गरेर नल्याउको त भन्ने उनको प्रश्न थियो ।
गृहमन्त्री लामिछानेले सुपर्दगी सन्धी नभएकाले राईलाई मलेसियाबाट ल्याउन कठिन भएको बताएका थिए ।
तर, शर्माले भने मलेसियाको कानून अनुसार प्रक्रिया पुर्याउन ल्याउन सकिने दाबी गरे ।
उपप्रधान तथा गृहमन्त्री लामिछानेले गत बिहीबार सहकारी ठगीको आरोप लागेका र अहिले फरार रहेका जीबी राई मलेसियामा रहेको र उनको लोकेसन पत्ता लागिसकेको बताएका थिए ।
चितवनमा पत्रकारहरूसँग कुरा गर्दै उनले भनेका थिए, ‘हामीलाई लोकसन थाहा भइसकेको छ । मलेसियाका गृहमन्त्रीले नै कन्फर्म गरिसक्नुभएको छ ।’
