एजेन्सी, कप्तान किलियन एम्बाप्पेको उत्कृष्ट प्रदर्शन र दुई गोलको मद्दतमा फ्रान्सले स्वीडेनलाई ३–० ले पराजित गर्दै फिफा विश्वकप २०२६ को अन्तिम १६ मा स्थान सुरक्षित गरेको छ।
बुधबार बिहान सम्पन्न खेलमा प्रभावशाली जित निकाल्दै फ्रान्सले लगातार तेस्रो पटक विश्वकपको फाइनल पुग्ने आफ्नो अभियानलाई थप मजबुत बनाएको हो।
अन्तिम १६ पार गर्न अब फ्रान्सले पाराग्वेको चुनौती सामना गर्नेछ।
जर्मनीलाई पेनाल्टी सुटआउटमा स्तब्ध बनाउँदै अघि बढेको पाराग्वेसँग शनिबार फिलाडेल्फियामा हुने खेलको विजेताले सेमिफाइनलमा क्यानडा वा मोरक्कोसँग प्रतिस्पर्धा गर्नेछ।
सन् १९९८ यता विश्वकपका नकआउट चरणमा फ्रान्सले केवल तीन खेल गुमाएको छ, जसमध्ये दुई हार फाइनलमा आएको थियो।
यसले पनि उपाधि दाबेदारका रूपमा फ्रान्सको बलियो उपस्थितिलाई पुष्टि गरेको छ। खेलमा दुई गोल गरेका एम्बाप्पेले व्यक्तिगत रूपमा पनि ऐतिहासिक उपलब्धि हात पारे।
उनले विश्वकप नकआउट चरणमा आफ्नो गोल संख्या १० पुर्याउँदै ब्राजिलका महान् स्ट्राइकर लिओनिडास र रोनाल्डोको ८–८ गोलको पुरानो कीर्तिमानलाई उछिने।
प्रतियोगितामा उनको व्यक्तिगत गोल संख्या ६ पुगेको छ, जसले उनलाई अर्जेन्टिनाका कप्तान लियोनेल मेस्सीसँग गोल्डेन बुटको दौडमा संयुक्त अग्रस्थानमा पुर्याएको छ।
विश्वकपमा एम्बाप्पेको कुल गोल संख्या १८ पुगेको छ। उनी अब मेस्सीको १९ गोलको सर्वाधिक विश्वकप गोलको कीर्तिमानभन्दा केवल एक गोलले मात्र पछाडि छन्।
उत्कृष्ट प्रदर्शनपछि ८५औँ मिनेटमा मैदानबाट बाहिरिँदा मुख्य प्रशिक्षक डिडियर डेसच्याम्प्सले उनलाई सम्मानस्वरूप शिर झुकाएर अभिवादन गरेका थिए।
न्युजर्सीस्थित मेटलाइफ स्टेडियममा ८० हजार ६६३ दर्शकमाझ खेलिएको खेल अत्यधिक गर्मी र खराब वायु गुणस्तरका बीच सम्पन्न भएको थियो।
करिब ३२ डिग्री सेल्सियस तापक्रम र उच्च आर्द्रताले खेलाडीहरूलाई कठिन चुनौती दिएको थियो।
पहिलो हाफको ‘हाइड्रेसन ब्रेक’का क्रममा फ्रान्सका डिफेन्डर लुकास डिग्नेले स्प्रिंकलरको पानीले शरीर चिस्याउँदै आफूलाई सहज बनाएका थिए।
फ्रान्सले सुरुदेखि नै स्वीडेनमाथि दबाब कायम राखेको थियो।
२०औँ मिनेटमा एम्बाप्पेको गोल अफसाइडका कारण मान्यता पाएन भने ३२औँ मिनेटमा उनको शक्तिशाली प्रहार क्रसबारमा लागेर फर्कियो।
त्यसलगत्तै माइकल ओलिसेको आकर्षक बाइसाइकल किक पनि बारमा लाग्दा फ्रान्स प्रारम्भिक अग्रताबाट वञ्चित रह्यो।
तर पहिलो हाफको ४५औँ मिनेटमा फ्रान्सले अन्ततः अग्रता लियो।
माइकल ओलिसेको कर्नरमा ओस्मान डेम्बेलेले हेडमार्फत मिलाइदिएको बललाई एम्बाप्पेले उत्कृष्ट फिनिस गर्दै टोलीलाई १–० को अग्रता दिलाए।
दोस्रो हाफको ५३औँ मिनेटमा स्वीडेनका गुस्ताफ लागरबिएल्केको गल्तीको लाभ उठाउँदै ओरेलियन चुआमेनीको पासमा माइकल ओलिसेले गोल गर्दै फ्रान्सको अग्रता दोब्बर बनाए।
७४औँ मिनेटमा एम्बाप्पे, बारकोला र ओलिसेबीच भएको आकर्षक पासिङ संयोजनको अन्त्य एम्बाप्पेले गोलमार्फत गर्दै व्यक्तिगत दोस्रो तथा टोलीका लागि तेस्रो गोल गरे र फ्रान्सको सहज जित सुनिश्चित गरे।
स्वीडेनले खेलभर केही अवसर सिर्जना गरे पनि त्यसलाई गोलमा परिणत गर्न सकेन।
पहिलो हाफमा इलियट स्ट्राउडको प्रहार लक्ष्यभन्दा माथिबाट बाहिरियो भने अन्तिम समयमा भिक्टर ग्योकेरेसको उत्कृष्ट अवसरलाई फ्रान्सका गोलरक्षक माइक म्याग्ननले शानदार बचाउ गर्दै टोलीको क्लिनसिट जोगाए।
