काठमाण्डौ । लगातारको वर्षा, बाढी तथा पहिरोका कारण देशका विभिन्न जिल्लाका प्रमुख राजमार्ग र सडक खण्ड प्रभावित बनेका छन्।
कतिपय स्थानमा पहिरो खस्ने क्रम नरोकिएको तथा क्षतिग्रस्त सडकको मर्मत सम्भार जारी रहेकाले सवारी आवागमनमा समस्या देखिएको छ।
नेपाल प्रहरीले दिएको जानकारीअनुसार हाल देशभरका पाँच प्रमुख सडक पूर्ण रूपमा अवरुद्ध रहेका छन् भने चार वटा सडकमा एकतर्फी मात्र सवारी सञ्चालन भइरहेको छ।
यात्रु तथा चालकहरूलाई यात्रा अघि सम्बन्धित सडकको अवस्थाबारे जानकारी लिएर मात्र यात्रा गर्न आग्रह गरिएको छ।
सबैभन्दा महत्वपूर्ण मानिएको बीपी राजमार्ग सम्भावित पहिरोको उच्च जोखिमका कारण अस्थायी रूपमा बन्द गरिएको छ।
सडक माथिबाट ढुंगा र माटो खस्ने जोखिम बढेपछि यात्रुको सुरक्षालाई ध्यानमा राख्दै आवागमन रोकिएको जनाइएको छ।
राजधानी काठमाडौंलाई पूर्वी नेपालसँग जोड्ने प्रमुख मार्ग भएकाले यसको अवरोधले यात्रु तथा मालवाहक सवारी साधनहरू प्रभावित भएका छन्।
त्यस्तै फाखेल–हुमाने–काठमाडौं सडक पनि पहिरो र सडक क्षतिको कारण पूर्ण रूपमा बन्द रहेको छ।
स्थानीय तह र सडक विभागले अवरुद्ध सडक खुलाउने प्रयास गरिरहेका छन्।
नेपाल–चीन व्यापार तथा आवागमनको महत्वपूर्ण मार्ग अरनिको राजमार्ग समेत अवरुद्ध भएको छ।
वर्षासँगै आएको पहिरोले सडकमा क्षति पुर्याएपछि सवारी आवागमन रोकिएको हो।
मुस्ताङ जाने पर्यटकीय तथा रणनीतिक महत्वको बेनी–जोमसोम सडक पनि विभिन्न स्थानमा पहिरो खसेपछि बन्द भएको छ।
यसले मुस्ताङ र आसपासका क्षेत्रको यातायात सेवामा प्रत्यक्ष असर पारेको छ।
कर्णाली प्रदेशका जाजरकोट–डोल्पा सडक तथा सुदूरपश्चिम प्रदेशको जयपृथ्वी राजमार्ग समेत अवरुद्ध सडकको सूचीमा रहेका छन्।
पहिरो पन्छाउने तथा सडक मर्मतको काम जारी रहे पनि तत्काल पूर्ण रूपमा सञ्चालनमा ल्याउन चुनौती रहेको सम्बन्धित निकायले जनाएको छ।
यता केही सडकमा भने सीमित रूपमा सवारी सञ्चालन भइरहेको छ।
घोराही–रुकुम शहीद मार्ग, मालमु–पाल्पा सडक, सिद्धार्थ राजमार्ग तथा मध्यपहाडी राजमार्गमा एकतर्फी मात्र सवारी साधन सञ्चालन भइरहेका छन्। सडकको एक भाग क्षतिग्रस्त भएका कारण पालैपालो सवारी पास गराउने व्यवस्था मिलाइएको छ।
मनसुन सक्रिय भएसँगै आगामी दिनमा थप पहिरो र बाढीको जोखिम रहने मौसमविद्हरूले चेतावनी दिएका छन्।
सडक विभाग, सुरक्षा निकाय तथा स्थानीय प्रशासनले जोखिमयुक्त क्षेत्रमा अनावश्यक यात्रा नगर्न र अत्यावश्यक अवस्थामा मात्र सावधानीपूर्वक यात्रा गर्न सर्वसाधारणलाई अनुरोध गरेका छन्।
यात्रुहरूको सुरक्षा सुनिश्चित गर्न सडकको अवस्था निरन्तर अनुगमन भइरहेको र अवरुद्ध मार्गहरू यथाशीघ्र सञ्चालनमा ल्याउन सम्बन्धित निकायहरू परिचालित रहेको जनाइएको छ।
