काठमाडौं । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनबाट निर्वाचित केन्द्रीय कार्यसमितिका सदस्यहरूको पद तथा गोपनीयताको शपथग्रहण कार्यक्रम आज हुँदैछ।
पार्टीका अनुसार बिहान ११ बजे काठमाडौंको वनस्थलीस्थित केन्द्रीय कार्यालयमा आयोजित विशेष समारोहमा नवनिर्वाचित पदाधिकारी तथा केन्द्रीय सदस्यहरूले शपथ लिनेछन्।
शपथग्रहणसँगै महाधिवेशनबाट चयन भएको नयाँ नेतृत्वले औपचारिक रूपमा आफ्नो कार्यभार सम्हाल्नेछ।
कार्यक्रममा पार्टीका शीर्ष नेताहरू, नवनिर्वाचित केन्द्रीय सदस्य तथा अन्य जिम्मेवार पदाधिकारीहरूको उपस्थिति रहने जनाइएको छ।
शपथपछि नवगठित केन्द्रीय कार्यसमितिको पहिलो बैठक बस्ने तयारीसमेत गरिएको छ, जहाँ संगठन सञ्चालन, कार्यविभाजन तथा आगामी कार्यक्रमबारे प्रारम्भिक छलफल हुने अपेक्षा गरिएको छ।
रास्वपाको पहिलो राष्ट्रिय महाधिवेशन असार ७ गतेदेखि सुरु भएको थियो। नेतृत्व चयनमा सहमति जुटाउने प्रयास, आन्तरिक परामर्श तथा निर्वाचन प्रक्रियाका कारण महाधिवेशन निर्धारित कार्यतालिकाभन्दा लम्बिएको थियो।
अन्ततः करिब छ दिनपछि महाधिवेशन सम्पन्न गर्दै पार्टीले नयाँ केन्द्रीय नेतृत्व चयन गरेको हो।
महाधिवेशनबाट ९९ जना केन्द्रीय सदस्य निर्वाचित भएका छन्। पार्टी विधानअनुसार केन्द्रीय समितिलाई पूर्णता दिन सभापतिले थप ५१ जना सदस्य मनोनीत गर्ने व्यवस्था रहेको छ।
मनोनयन प्रक्रिया पूरा भएपछि पार्टीको केन्द्रीय कार्यसमिति पूर्ण रूपमा गठन हुनेछ।
रास्वपाले पहिलो महाधिवेशनमार्फत संगठनात्मक संरचनालाई संस्थागत बनाउने, पार्टीलाई देशव्यापी रूपमा थप विस्तार गर्ने तथा आगामी राजनीतिक कार्यदिशालाई प्रभावकारी रूपमा अघि बढाउने लक्ष्य लिएको जनाएको छ।
महाधिवेशनबाट पारित नीति, कार्यक्रम र संगठनात्मक निर्णय कार्यान्वयन गर्ने जिम्मेवारी अब नयाँ नेतृत्वको काँधमा रहनेछ।
