काठमाडौं महानगरपालिकाको कार्यालय अगाडि कवाड व्यवसायीहरूको प्रदर्शन

काठमाण्डू, संविधानले दिएको पेशा व्यवसाय गर्न पाउने हक अधिकारको ग्यारेन्टीसँगै विभिन्न माग राखेर काठमाडौं महानगरविरुद्ध कवाड व्यवसायी पुन: आन्दोलित भएका छन् । व्यवसायीले आज काठमाडौं महानगरपालिकाको कार्यालय घेराउ गरे ।

कवाड व्यवसायी, संकलक र मजदुरमाथि महानगर प्रहरीबाट कुटपिट, अपहरण, ज्यादती, र संरचना भत्काउने कार्य भइरहेको भन्दै उनीहरूले तत्काल रोकिनुपर्ने, ज्यादतीमा संलग्न प्रहरीलाई कारबाही गर्नुपर्ने र क्षतिपूर्ति पनि दिनुपर्ने माग राखेका छन् । कवाड व्यवसायी समाजको आव्हानमा ५ बुँदे मागसहित उनीहरू आन्दोलनमा उत्रिएका हुन् । पत्रकार सम्मेलनमा कवाड व्यवसायी ओमप्रकाश सिंहले महानगरविरुद्ध निर्णायक आन्दोलन गर्ने बताए । मेयर आफूहरूलाई गरिखान नदिएको उनीहरूको गुनासो छ ।