काठमाण्डू, चर्चित टिकटकर तुलसा (तुलसी) अधिकारीलाई ठगी, आपराधिक लाभ र सम्पत्ति शुद्धीकरणसम्बन्धी मुद्दामा पक्राउ गरी नेपाल ल्याएर प्रहरी हिरासतमा राखिएको छ ।
थाइल्यान्डबाट पक्राउ परेकी उनलाई रेड नोटिसका आधारमा नेपाल फर्काइएको हो ।
ललितपुर जिल्ला सरकारी वकिल कार्यालयले चार महिनाअघि दायर गरेको अभियोगअनुसार अधिकारीमाथि हनी ट्र्याप शैलीमा करोडौँ रुपैयाँ ठगी गरेको आरोप छ ।
पीडित शंकर चिमोरियाको जाहेरीका आधारमा उनीविरुद्ध ठगी, आपराधिक लाभ, आपराधिक विश्वासघात, संगठित अपराध र सम्पत्ति शुद्धीकरणसमेत पाँच कसुरमा मुद्दा अघि बढाइएको हो ।
अभियोगपत्रमा २०७५ सालदेखि चिनजानका क्रममा बनेको सम्बन्धलाई आधार बनाएर सहमतिमा भएको व्यक्तिगत सम्बन्धपछि ‘जबरजस्ती करणी’ मुद्दा हाल्ने धम्की दिई रकम असुली गरिएको दाबी गरिएको छ ।
अनुसन्धान प्रतिवेदनअनुसार विभिन्न बहानामा पटक–पटक गरी ६ करोड ५२ लाख रुपैयाँभन्दा बढी रकम असुल गरिएको उल्लेख छ ।
प्रहरी विवरण अनुसार सो रकम घर, पसल, गहना, गाडी, शैक्षिक खर्चदेखि विदेशमा समेत पठाइएको देखिएको छ ।
अनुसन्धानमा तुलसी अधिकारीले उक्त रकम विभिन्न बैंक खाता, लगानी र सम्पत्ति खरिदमार्फत व्यवस्थापन गरेको दाबी गरिएको छ ।
सम्पत्ति शुद्धीकरणसम्बन्धी भागमा भने करिब २१ करोड रुपैयाँभन्दा बढीको कारोबार ‘प्लेसमेन्ट, लेयरिङ र इन्टिग्रेसन’ प्रक्रियाबाट विभिन्न खातामा सारिएको भन्दै ठूलो बिगो कायम गरिएको छ ।
यस प्रकरणमा नेलिका लामिछानेसहित अन्य केही व्यक्तिको संलग्नता रहेको अभियोगपत्रमा उल्लेख भए पनि केही प्रतिवादी धरौटीमा छुटेका छन् भने केही फरार छन् ।
पीडित शंकर चिमोरियाले २०७५ सालदेखि शुरु भएको व्यक्तिगत सम्बन्धपछि धम्की र दबाबमार्फत निरन्तर रकम असुली गरिएको भन्दै उजुरी दिएका थिए ।
सोही आधारमा प्रहरी अनुसन्धानपछि मुद्दा अदालत पुगेको हो ।
हाल तुलसा अधिकारी ललितपुर प्रहरीको हिरासतमा रहेकी छन् र मुद्दाको प्रक्रिया अघि बढिरहेको प्रहरीले जनाएको छ ।
