एजेन्सी, भारतमा जारी १६ औँ सिजनको इण्डियन प्रिमियर लिग (आइपिएल) अन्तर्गत गएराति सम्पन्न खेलमा पञ्जाब किंग्सले लखनउ सुपर जायन्ट्सलाई २ विकेटले हराएको छ ।
जारी सिजनमा पञ्जाबको यो तेस्रो जीत हो । उसले दुई खेलमा भने हारको सामना गरेको छ । आफ्नो पाँचौं खेलमा लखनउले दिएको १ सय ६० रनको लक्ष्य पञ्जाबले १९.३ ओभरमा ८ विकेटको क्षतिमा भेट्टायो ।
उसका लागि जिम्बाब्वेका अलराउन्डर सिकन्दर राजाले अर्धशतकीय पारी खेले । ४१ बलको सामना गरेका उनले ४ चौका र ३ छक्कासहित सर्वाधिक ५७ रन बनाए ।
त्यस्तै, म्याथ्यू सर्टले ३४, जितेश शर्माले २३ र हरप्रित सिंहले २२ रनको योगदान दिए । बाँकी ब्याटरले भने दोहोरो अंकमा समेत रन बनाउन सकेनन् ।
लखनउका लागि रवि विश्नोई, मार्क वुड र युधवीर सिंहले दुईरदुई तथा कृणाल पाण्ड्या र कृष्णप्पा गौतमले एकरएक विकेट लिए ।
त्यसअघि लखनउस्थित अटल बिहारी वाजपेयी एकना स्टेडियममा टस हारेर ब्याटिङको मौका पाएको जायन्ट्सले निर्धारित २० ओभरमा ८ विकेट गुमाएर १ सय ५९ रन बनायो ।
उसका लागि कप्तान केएल राहुलले अर्धशतकीय पारी खेले । ५६ बलको सामना गरेका उनले ८ चौका र १ छक्कासहित सर्वाधिक ७४ रन बनाए ।
त्यस्तै, कायल मेयर्सले २९, कृणाल पाण्ड्याले १८ र मार्कस स्टोइनिसले १५ रन जोडे । पञ्जाबका लागि कप्तान साम करनले उत्कृष्ट बलिङ गरे ।
उनले चार ओभरमा ३१ रन दिएर सर्वाधिक तीन विकेट लिए । लखनउविरुद्ध चोटका कारण नियमित कप्तान शिखर धवनले विश्राम लिएका थिए ।
त्यस्तै, कागिसो रबाडाले दुई, हरप्रित ब्रार, अर्शदीप सिंह र सिकन्दर राजाले एकरएक हात पारे । यो जीतसँगै पञ्जाब ६ अंकसहित तालिकाको चौथो स्थानमा उक्लिएको छ ।
हारका बाबजुद लखनउ ६ अंकसहित दोस्रो स्थानमा कायमै छ । उसले ५ खेल खेल्दा तीनमा जित र दुई खेलमा हारको सामना गरेको छ ।
