काठमाडौं, आईसीसी विश्वकप लिग टू अन्तर्गत नेपालले आज शुक्रबार स्कटल्याण्डसँग खेल्दैछ ।
खेल त्रिवी क्रिकेट मैदान कीर्तिपुरमा विहान ९ बजेपछि सुरु हुनेछ । यो शृङ्खलाको पहिलो खेलमा नेपालले नामिबियालाई २ विकेट र स्कटल्याण्डले नामिबियालाई १० विकेटले हराएका थिए ।
नेपालले स्कटल्याण्डसँग पहिलो पटक घरेलु मैदानमा शृङ्खला खेल्न लागेको हो । नेपाल र स्कटल्याण्ड एकदिवसीय अन्तराष्ट्रियमा चार पटक खेलेका छन् । १ खेलमा नेपाल र ३ खेलमा स्कटल्याण्ड विजयी भएको छ ।
नेपाललाई सीधा बाटोबाटै एकदिवसीय मान्यता जोगाइराख्न अबका खेलहरु जित्नैपर्ने दबाब छ ।
७ देश सहभागि लिगका ५ वटा देशले सीधा बाटोबाट एकदिवसीयको मान्यता कायम राख्नेछन् । बाँकी २ देशले क्वालिफायर खेल्नुपर्नेछ ।
यो शृङ्खलामा नेपाल, नामिबिया र स्कटल्यान्ड रहेका छन् । स्कटल्यान्ड ३३ खेलमा ४८ अङ्कका साथ शीर्ष स्थानमा कायमै छ । नामिबिया ३२ खेलमा ३७ अङ्कका साथ तेस्रो स्थानमा छ ।
