काठमाडौं, तराई–मधेशमा १२ महिना नै सिँचाइ सुविधा पुर्याउने लक्ष्यका साथ शुरु गरिएको सुनकोशी मरिण डाइभर्सन आयोजनाको सुरुङ खन्ने काम अब पाँच सय १० मिटर बाँकी छ ।
वैशाख २६ गते सुरुङ छिचोल्ने अर्थात् ‘ब्रेक थ्रू’ गर्ने तयारी भइरहेको छ । कुनै भौगोलिक जटिलता उत्पन्न नभए आउँदो वैशाख २६ गते विशेष समारोहको आयोजना गरी सुरुङ छिचोल्ने आयोजनाले जनाएको छ ।
सुनकोशी मरिण डाइभर्सन आयोजनाका प्रमुख मित्र बरालका अनुसार १३ दशमलव तीन किलोमिटर लामो सुरुङमध्ये अहिलेसम्म १२ दशमलव सात सय ९० किलोमिटर सुरुङ निर्माण सम्पन्न छ ।
सुरुङ निर्माणमा अटोमेटिक टनेल बोरिङ मेशिन ९टीबीएम० प्रयोग गरिएको छ । भेरी बबई डाइभर्सन आयोजनापछि सुनकोशी मरिणमा पनि टीबीएम मेशिन प्रयोग गरिएको हो ।
सुनकोशी गाउँपालिका–७ कानढुङ्ग्रीमा रहेको सिन्धुली र रामेछाप जिल्लाको सिमाना भएर बग्ने सुनकोशी नदीलाई मरिण खोलामा पथान्तरण गरिनेछ ।
सुनकोशीको झन्डै ६७ क्युसेक पानीलाई सुरुङमार्फत सिन्धुलीको कमलामाई नगरपालिका–२ कुसुमटारमा रहेको मरिण खोलामा खसालिनेछ ।
त्यसपछि बाग्मती सिँचाइ आयोजनाको पूर्वाधार प्रयोग गरेर धनुषा, महोत्तरी, सर्लाही, रौतहट र बाराका जमिनमा सिँचाइ गर्ने लक्ष्य राखिएको छ । त्यस्तै यो आयोजनाबाट ३१ मेगावाट बिजुली उत्पादन हुनेछ ।
