नुुवाकोट, प्रधानमन्त्री पुष्पकमल दाहालले छहरे–टोखा सुरुङमार्ग निर्माण राजनीति गर्ने विषय नभई यो राष्ट्रको बृहत् हितका निम्ति हुने बताएका छन् ।
शनिबार पञ्चकन्या गाउँपालिकाको प्रशासकीय भवन उद्घाटन कार्यक्रममा सम्बोधन गर्दै प्रधानमन्त्री दाहालले छहरे(टोखा सुरुङमार्ग निर्माणमा सबैले राष्ट्रिय एकता प्रदर्शन गर्नुपर्ने बताए ।
प्रधानमन्त्री दाहालले छहरे–टोखा सुरुङमार्गले धेरैतिर बहुआयामिकरुपले नेपाल राष्ट्रको हित, आर्थिक क्रियाकलापमा हुने हुनाले हामीले राजनीतिक आग्रहबाट हेर्न नहुने स्पस्ट पारे ।
प्रधानमन्त्री दाहालले राष्ट्रको आवश्यकतालाई हेरेर मैले कूटनीतिक तहमा र राजनीति तहमा पनि यो सुरुङमार्ग अगाडि बढाउन योगदान भएको र यो पटक नुवाकोटले नीति तथा कार्यक्रममा पनि र बजेटमा पनि सकारात्मक हिस्सेदारी प्राप्त गरेको उल्लेख गरे ।
कार्यक्रममा अर्थमन्त्री डा. प्रकाशशरण महतले दुप्चेश्वर गाउँपालिका नाम्सापुराण नुवाकोटस्थित छेवाङ ग्लान ङाछर्यालिङ गुम्बामा गुरु पद्म्सम्भव मूर्तिको प्राण प्रतिस्थापन तथा समुद्घाटन कार्यक्रममा सरकारको प्राथमिकतामा पूर्वाधार विकास रहेको बताएका छन् ।
‘हामीसँग राजस्वबाट प्राप्त हुने आम्दानी यो वर्ष थोरै छ । यो थोरै आम्दानीलाई देशैभरिको विकास निर्माणमा पुर्याउनुपर्ने हुन्छ । स्रोतको समस्या छ, यसका बाबजुद जे सम्भव हुन्छ, मबाट काम हुनेछ,’ उनले भने ।
मन्त्री डा. महतले ‘नेपाली कांग्रेसले विकास निर्माणलाई सधैं प्राथमिकता दिँदै आएको बताए । कांग्रेस जहिले सरकारमा हुन्छ, त्यसबेला जनताको पीरमर्का, आवश्यकता र विकास निर्माणलाई प्राथमिकतामा राखेको हुने उनको भनाइ थियो ।
प्रदेश सरकारको लगानीमा सिधैं राजधानी काठमाडौं(खोले गाउँ(महाकाली हुँदै दुप्चेश्वर जोडिँदै छ । ट्रयाक जोडिसकेको छ, अब पक्की बाटो बन्दै छ ।
केन्द्र सरकारको लगानीमा गंगटे त्रिशुलीदेखि नै गोल्फु भञ्ज्याङसम्म जाने बाटो बनेको छ’ अर्थमन्त्री डा. महतले भने, समुन्द्र टारदेखि यता, त्यो कच्ची छ, बर्खामा धेरै अप्ठ्यारो छ ।
यो बाटोलाई पक्की गर्नुपर्ने आवश्यकता छ । ढिकुरेदेखि समुन्द्रटारसम्मको बाटो पनि स्तरोन्नति गर्न आवश्यक छ ।
यसका लागि आवश्यक बजेट विनियोजन हुनेछ । यो काम हामी गछौं, यो दुईओटा बाटो जोडिसकेपछि यहाँका जनताका कठिनाइका दिन अन्त्य हुनेछ ।’
कार्यक्रममा डा. महतले भने, हामी सबै धर्म, संस्कार, नैतिक मूल्य र मान्यताले बाँचेका छौं । हजारौं वर्षदेखि हामी एकअर्काप्रति सद्भाव बाँड्दै अगाडि बढेका छौं ।
त्यो हाम्रो महान धर्म संस्कृति र त्यसले सिकाएको पाठका आधारमा हामी सञ्चालित छौं । प्रचीन छेवाङ ग्लाङ ग्याङ छालिङ गुम्बामा बुद्धपछिको बुद्ध पद्मसम्भव गुरु रिम्पोचेको मूर्ति स्थापित भएको छ । यसले शान्ति, सद्भाव र आत्म ज्ञान विकास गर्न मद्दत पुग्नेछ ।’
‘पद्मसम्भवले १२ सय वर्ष अगाडि तपस्या गरेर तिब्बतमा बुद्ध धर्म फैलाएका थिए । नेपालको ठाउँ ठाउँमा उनको उपस्थिति रहेको छ । पद्म सम्भवले सिकाएको पाठलाई अनुशरण गर्दै हामी अगाडि बढ्नुपर्छ’ अर्थमन्त्री डा. महतले भने ।
पञ्ककन्या गाउँपालिका ३ लाकुरीभन्ञ्जायमा बनेको नयाँ तीनतले भवनमा २७ कोठा छन् । यसको लागत ६ करोड २ लाख रुपैयाँ रहेको पालिकाले जनाएको छ । प्रधानमन्त्री दाहालले डिपबोरिङ, भवन अगाडिको बुद्धको मूर्तिसमेत उद्घाटन गरे ।
कार्यक्रममा संघीय सांसद हितबहादुर तामाङ, वाग्मती प्रदेश सदस्य राधिका तामाङ, रमेशकुमार महतले धारणा राखेका थिए ।
