काठमाडौं, राष्ट्रियसभा सदस्य निर्वाचनअन्तर्गत आज अन्तिम मतदाता नामावली प्रकाशन गरिने भएको छ ।
निर्वाचन अधिकृतको कार्यालयमा अन्तिम मतदाता नामावली प्रकाशन हुने निर्वाचन आयोगले जनाएको छ ।
पुस २० गते प्रकाशित मतदाता नामावली उपर दाबी विरोधलगायत समयसिमा सकिएको छ । दाबी विरोधको प्रक्रिया सकिएसँगै आयोगले मतदाताको अन्तिम नामावली सार्वजनिक गर्न लागेको हो ।
भोलि बिहान १० देखि दिउँसो ३ बजेसम्म उमेदवारको मनोनयन दर्ता गर्ने कार्यतालिका छ । पुस २७ गते उमेदवारको अन्तिम नामावली प्रकाशन गरिनेछ ।
पुस २८ गते बिहान १० देखि दिउँसो १ बजेसम्म उमेदवारलाई निर्वाचन चिन्ह प्रदान गरिने निर्वाचन कार्यतालिका छ ।
माघ ११ गते बिहान ९ देखि दिउँसो ३ बजेसम्म मतदान हुने छ । राष्ट्रियसभामा रिक्त १९ पदका लागि निर्वाचन हुन लागेको हो ।
