जनकपुरधाम, मधेस प्रदेशका नवनियुक्त मुख्यमन्त्री कृष्णप्रसाद यादवले मंसिर २४ गते विश्वासको मत लिने भएका छन् ।
आइतवार बसेको सत्तापक्षीय सातदलीय गठबन्धनको बैठकले त्यस दिन विश्वासको मत लिने निर्णय गरेको जसपाका प्रमुख सचेतक रामआशिष यादवले बताए ।
उनी यही मंसिर १९ गते मुख्यमन्त्री नियुक्त भएका थिए । यादवले आइतवार पद तथा गोपनीयताको शपथ ग्रहण गरेका छन् ।
उनले आइतवार नै सानो आकारको मन्त्रिमण्डल गठन गरेका छन् । विश्वासको मत लिएपछि मन्त्रिपरिषद्लाई पूर्णता दिने उनको तयारी छ ।
कांग्रेस संसदीय दलका नेता यादव ७७ जना प्रदेशसभा सदस्यको समर्थनमा गत शुक्रबार मुख्यमन्त्री नियुक्त भएका थिए ।
एमाले संसदीय दलका नेता सरोजकुमार यादवले मंसिर १७ गते राजीनामा दिएपछि कांग्रेस संसदीय दलका नेता यादव मुख्यमन्त्री नियुक्त भएका थिए ।
