काठमाण्डू, नेपाली कांग्रेसका नेता डा. शेखर कोइराला पार्टीको निर्णय मानेर निर्वाचनमा होमिन आफ्ना पक्षका नेताहरुलाई निर्देशन दिएका छन् ।
आइतबार काठमाडौंमा आफूपक्षीय नेताहरुको भेलामा बोल्दै उनले पार्टीको विवादबारे सर्वोच्चमा मुद्दा गएको भएपनि निर्वाचनमा होमिन निर्देशन दिएका हुन् ।
भेलामा सहभागी एक नेताले अदालतले जे आदेश दिएपनि मान्ने गरी अहिले आफ्नो जिल्ला क्षेत्रमा जान नेता डा. कोइरालले भनेको बताए ।
भेलामा नेता डा. कोइरालाले अहिले निर्वाचन आयोगको निर्णय कार्यन्वयनमा गैसकेको हुँदा पार्टीले गर्ने उम्मेदवार चयनको प्रक्रिया र निर्वाचनमा पार्टीलाई जिताउने कार्यमा लाग्न सबैलाई अनुरोध गरेको पनि उनले जानकारी दिए ।
‘मुलुकमा भएको संविधान संकट र पार्टीभित्र भएको जटिल परिस्थितिमा पार्टीका उम्मेदवारहरुलाईअग्रणी रुपमा रहेर सहयोग गर्न र निर्वाचित गराउन आग्रह गर्छु’ नेता डा. कोइरालाले भनेको ती नेताले बताए ।
शुक्रबार नेपाली कांग्रेसको आधिकारिकताबारे आयोगले बहुमतबाट विशेष महाधिवेशनबाट निर्वाचित गगन थापा नेतृत्वको नेपाली कांग्रेसलाई आधिकारिकता प्रदान गरेको थियो ।
त्यससँगै शेरबहादुर देउवा पक्ष विरोधमा छ । देउवा पक्षले सर्वोच्च अदालतमा आज रिटदर्ता गराइसकेको छ ।
भेलामा नेता डा. कोइरालाले निर्वाचनसँगसँगै आगामी १५ औं महाधिवेशनमा पनि ध्यान केन्द्रित गर्न सबैलाई आग्रह गरेको पनि ती नेताले जानकारी दिए ।
कांग्रेसनेले नेपाली जनताको सार्वभौम अधिकार रक्षा गर्न सधैँ निरन्तर लागिरहनु पर्ने भन्दै निर्वाचनमा ध्यान केन्द्रित गरेर आफ्नो भूगोल क्षेत्रमा जान आग्रह गरेको एक नेताले जानकारी दिए ।
