काठमाडौं, सुन तस्करी प्रकरणमा पक्राउ परेका पूर्वसभामुख एवं माओवादी केन्द्रका उपाध्यक्ष कृष्णबहादुर महराको बयान आज सक्ने तयारी गरिएको छ ।
सरकारी वकिलको कार्यालयमा हिजोदेखि सुरु गरिएको बयान लिने काम आज सक्ने तयारी गरिएको हो ।
महराको स्वास्थ्य अवस्था कमजोर रहेको भन्दै केन्द्रीय अनुसन्धान ब्यूरो सिआइबीले छिटो अनुसन्धान गरी पुरक प्रतिवेदन बुझाउने बताएको छ ।
बयानका लागि महरालाई आज पनि नर्भिक अस्पतालबाटै सरकारी वकिलको कार्यालय लगिने छ । स्वास्थ्यको कारण देखाउदै महरालाई प्रहरी हिरासतमा नराखी अस्पतालमा राखिएको हो ।
काठमाडौँ जिल्ला अदालतबाट अनुसन्धानका लागि पाएको चार दिनको अनुमति आज सकिँदैछ । महराको बयान नसकिए पुनः म्याद थपका लागि अदालतसँग अनुमति मागिने सीआइबीले जनाएको छ ।
सुन तस्करी प्रकरणमा महरा सोमबार पक्राउ परेका थिए । यही प्रकरणमा महराका कान्छा छोरा राहुललाई पनि प्रहरीले हिरासतमा राखेर अनुसन्धान गरिरहेको छ ।
भेपभित्रको ९ केजी र ब्रेक सुभित्रको ६० केजी सुन तस्करी प्रकरणको अनुसन्धानको जिम्मेवारी पाएको सिआइबीले पूर्वसभामुख महरालाई यसअघि सामान्य सोधपुछ गरी कागजी बयान लिएर छाडेको थियो ।
