एजेन्सी, अफगानिस्तानको भूकम्पमा परी कम्तिमा ६०० जनाको ज्यान गएको बीबीसीले जनाएको छ ।
तालिबान आन्तरिक मन्त्रालयले पूर्वी अफगानिस्तानमा गएको भूकम्पबाट मृत्यु हुनेको संख्या ६१० रहेको रिपोर्ट गरिरहेको समाचारमा उल्लेख छ ।
भूकम्पमा १ हजार ३०० भन्दा बढी व्यक्ति घाइते भएको मन्त्रालयले जनाएको छ । अधिकारीहरूले मृतकको संख्या अझै बढ्न सक्ने बताएका छन् ।
आइतबार राति ११:४७ बजे (स्थानीय समय) अफगानिस्तानमा ६.३ म्याग्निच्युडको भूकम्प गएको थियो ।
अमेरिकी भूगर्भ सर्वेक्षण (यूएसजीसी) का अनुसार, भूकम्प जलालाबाद शहरबाट लगभग १७ माइल टाढा गएको थियो ।
जलालाबादको जनसंख्या लगभग दुई लाख छ र यो राजधानी काबुलबाट सडक मार्गबाट १०० माइलभन्दा कम दूरीमा छ ।
रातभरि शहरमा भूकम्पको शक्तिशाली धक्का महसुस गरिएको थियो ।
धेरैजसो मृत्यु छिमेकी कुनार प्रान्तमा भएको छ । सरकारका प्रवक्ता जबिहुल्लाह मुजाहिदले पनि भूकम्पले देशका केही पूर्वी प्रान्तहरूमा गम्भीर जनधनको क्षति पुर्याएको बताएका छन् ।
बीबीसीकाअनुसार अफगानिस्तानको पाकिस्तानसँगको सीमा नजिकका क्षेत्रहरूमा घरहरू भग्नावशेषमा परिणत भएका छन् । यो क्षेत्र पहाडी हो, जहाँ सीमित सञ्चार छ ।
यसअघि ७ अक्टोबर २०२३ मा अफगानिस्तानमा विनाशकारी भूकम्प गएको थियो । तालिबान सरकारले उक्त भूकम्पमा ४ हजारको मृत्यु भएको दाबी गरेको थियो ।
त्यसैगरी, २०२२ मा पूर्वी अफगानिस्तानमा ५.९ म्याग्निच्युडको भूकम्प गएको थियो, जसमा करिब १ हजार मानिसको मृत्यु भएको थियो र हजारौं घाइते भएका थिए ।
अफगानिस्तानमा शक्तिशाली भूकम्प गैरहन्छ । हिन्दुकुश पर्वतश्रृंखलालाई भूकम्पको हिसाबले सक्रिय मानिन्छ, जहाँ हरेक वर्ष भूकम्प आउँछ ।
