बिर्तामोड, नेपालको पूर्वीद्धार तथा प्रमुख व्यापारीक केन्द्र र तिब्रगतिमा सहरीकरण तर्फ उन्मुख हुदै गहिरहेको कोशी प्रदेशको झापा जिल्लामा अवस्थित बिर्तामोड नगरपालिका मिति २०७१ बैशाख २५ गते साविक अनारमनी गा.वि.स. र चारपाने गा.वि.स. समावेश भई पहिलो पटक नगरपालिका घोषणा भएको हो ।
हाल आएर नेपालको संविधान भाग ५ मा भएको व्यवस्था बमोजिम मिति २०७३ फाल्गुन २७ गते नेपाल सरकारले साविक बिर्तामोड नगरपालिका र गरामनी गा.वि.स. लाई समावेश गराई पुनः दोस्रो पटक बिर्तामोड नगरपालिका घोषणा भएको हो ।
बिर्तामोड नगरपालिका कोशी प्रदेशको राजधानी बिराटनगरबाट करिव १०० कि।मि। र झापाको सदरमुकाम भद्रपुरबाट करिव १८ कि.मि. दूरीमा अवस्थित रहेको छ ।
यस नगरपालिकाको उत्तरमा अर्जुनधारा नगरपालिका, पूर्वमा मेचिनगर नगरपालिका,दक्षिणमा हल्दिबारी र बाह्रदशी गाउँपालिका र पश्चिममा कन्काई नगरपालिका सिमाना रहेका छन् ।
बिर्तामोड नगरपालिकाको कार्यालय बिर्ताबजारमा अवस्थित छ ।
यस नगरपालिका अन्तर्गत १० वटा वडा कार्यालयहरु रहेका छन भने २ वटा निर्वाचन क्षेत्र २ र ३ नं क्षेत्र रहेको यस नगरपालिकाको कुल क्षेत्रफल ७८।२४ वर्ग कि।मि छ ।
२६ं,६३’,७९’’ उत्तरी अक्षांश र ७८ं,९४’,५९’’ पूर्वी देशान्तर बीचमा यो नगरपालिका फैलिएको छ ।
राष्ट्रिय जनगणना २०७८को जनगणना अनुसार बिर्तामोड नगरपालिकाको कुल जनसङ्ख्या १,१६,१९२ रहेको छ भने यहाँ २९,८५२ घरधुरी रहेका छन्।
धनीपुर्जा वितरण
बिर्तामोड नगरपालिकाले भूमिहिन सुकुम्बासी ९ जनालाई जग्गाको धनीपुर्जा वितरण गरेको छ।
नगरपालिकामा आज आयोजित कार्यक्रममा वडा नम्बर ७ का ९ जनालाई नगरप्रमुख पवित्रा महतारा प्रसाईले धनीपुर्जा वितरण गरिन ।
धनीपुर्जा प्राप्त गर्नेहरुमा निरानध्वज लिम्बु २ कट्ठा ४ धुर, अमृतबहादुर लिम्बु २ कट्ठा १७ धुर, निर्मला लिम्बु १० धुर, हरिकला मगर १ कट्ठा ९ धुर, मसीप्रकाश राई ७ कट्ठा ५ धुर, आईतराज लिम्बु १ कट्ठा ७ धुर, मैतीमाया लिम्बु ९ कट्ठा १८ धुर, गुरुदेव घिमिरे १ कट्ठा साढे १८ धुर र कृष्णबहादुर थापा ६ कट्ठा ५ धुर रहेका छन्।
यसअघि बिर्तामोड नगरपालिकाले ३ जनालाई धनीपुर्जा वितरण गरेको थियो।
सडक स्तरोन्नति
बिर्तामोड नगरपालिका १० स्थित शिवालय चोकदेखि कटर डाँगी हुँदै सापडिग्री पुल जोड्ने सडक स्तरोन्नति हुने भएको छ ।
सो सडकको आज नगर प्रमुख पवित्रा महतारा प्रसाईले पूर्वाधार विकास आयोजना कार्यालय, ईटहरीको प्राविधिक टोली सहित नापजाँच गरेको छ ।
सडक स्तरोन्नतिको लागि संघीय सरकारले ३ करोड रुपैयाँ बजेट विनियोजन गरेको छ ।
नापजाँच टोलीमा नगर प्रमुख प्रसाईसँगै नेकपा (एमाले) बिर्तामोड नगर कमिटीका अध्यक्ष सुवास भट्टराई, स्थानीय समाजसेवी ज्ञानुनाथ मैनाली, कोशिश घिमिरे लगायतको सहभागिता रहेको थियो ।
पुल उद्घाटन
झापाको बिर्तामोड नगरपालिका वडा नम्बर २ र कनकाई नगरपालिका वडा नम्बर ९ जोड्ने घाग्रा खोलामा निर्माण गरिएको पुलको उद्घाटन गरिएको छ ।
एक संक्षिप्त कार्यक्रमकाबीच कोशी प्रदेश सरकारका खानेपानी, सिँचाइ तथा ऊर्जा मन्त्री एकराज कार्कीले २८ मिटर लामो उक्त ट्रस पुलको उद्घाटन गरे ।
उपभोक्ताको ८० हजार ४ सय ४१ रुपैयाँ २७ पैसा जनश्रमदान र पूर्वाधार विकास कार्यालयको ३९ लाख ४१ हजार ६ सय २२ रुपैयाँ ३५ पैसा गरी कुल ४० लाख २२ हजार ६३ रुपैयाँ ७२ पैसामा पुल निर्माण सम्पन्न भएको जनाइएको छ ।
यस पुलबाट प्रत्यक्षरुपमा २ सय ६६ घर लाभान्वित हुनेछन् । पुल निर्माणमा सहारा नेपालकोसमेत सामाजिक तथा प्राविधिक सहयोग रहेको छ ।
काँकडभिट्टा–लौकही सडक
बिर्तामोड नगरपालिका प्रमुख पवित्रा महतारा प्रसाईले निर्माणाधीन काँकडभिट्टा–लौकही सडक योजनाअन्तर्गत बिर्तामोड बजार क्षेत्रको काम चाँडै सम्पन्न गर्न आग्रह गरेकी छन् ।
भौतिक पूर्वाधार तथा यातायात मन्त्रालयअन्तर्गत सडक विभाग, आयोजना निर्देशनालय सासेक राजमार्ग अभिवृद्धि आयोजनाद्वारा आयोजित यौन रोग तथा मानव बेचबिखनसम्बन्धी सचेतनामूलक कार्यक्रममा बोल्दै प्रमुख प्रसाईले कुनै समस्या आए छलफल र समन्वयमार्फत समाधान गर्न नगरपालिका तयार रहेको बताइन ।
तर, ढिलाइ नगरी तीव्र गतिमा काम अघि बढाउनु आवश्यक रहेकोमा उनले जोड दिइन ।
नगर प्रमुख प्रसाईले बिर्तामोडका धेरै स्थान डुवान सम्भावित क्षेत्र भएकोले सडक दुबै छेउमा समानान्तर ड्रेन निर्माण गर्न सुझाव दिइन ।
चेक हस्तान्तरण
बिर्तामोड नगरपालिकाले शुक्रबार २४ जना कृषकहरुलाई समर्थन मूल्य वापत १२ लाख ८१ हजार ८ सय ८७ रुपैयाँ वितरण गरेको छ ।
नगरप्रमुख पवित्रा महतारा प्रसाईले उक्त रकम बराबरको चेक हस्तान्तरण गरिन ।
पुस्तक खरिद
राष्ट्रिय आविष्कार केन्द्र सञ्चालनका लागि बिर्तामोड नगरपालिकाले ५० हजार रुपैयाँ सहयोग गरेको छ ।
नगर प्रमुख पवित्रा महतारा प्रसाईले ५० हजार रुपैयाँ बराबरको ‘महावीर पुनः सम्झना, सपना र अविरल यात्रा’ नामक पुस्तक खरिद गरेर सहयोग गरेकी हुन् । ।
कार्यक्रममा नगर प्रमुख प्रसाईले केन्द्रका अध्यक्ष महावीर पुनको प्रशंसा गर्दै उहाँले सञ्चालन गरेको अभियान अत्यन्त महत्वपूर्ण रहेको बताइन ।
प्रमुख प्रसाईले पुस्तक खरिद गरेर सहयोग गर्न सबैलाई आग्रहसमेत गरिन । त्यसैगरी, नगर उपप्रमुख नगेन्द्र प्रसाद संग्रौलाले डा। पुनको प्रयासको सम्मान र प्रोत्साहन गर्नुपर्ने धारणा व्यक्त गरे ।
