२०८१ जेठ ६ आइतवार | Sunday, May 19 2024

संसद कर्मचारी युनियनको अध्यक्षमा कांग्रेस, उपाध्यक्षमा एमाले र सचिवमा माओवादी निर्वाचित

काठमाडौं, संघीय संसद सचिवालय कर्मचारी युनियनको अध्यक्षमा कांग्रेस, उपाध्यक्षमा एमाले र सचिवमा माओवादी समर्थित उम्मेदवार निर्वाचित भएका छन् ।

बुधबार भएको निर्वाचनमा कांग्रेस र माओवादीले चुनावी तालमेल गरेका थिए । एमालेले एक्लै प्रतिस्पर्धा गरेको थियो । मतपरिणाम भने मिश्रित आएको छ ।

अध्यक्षमा कांग्रेस माओवादी प्यानलबाट चुनाव लडेका कांग्रेस समर्थित गोविन्द बेल्वासे ८६ मत ल्याएर विजयी भए ।

उनका निकटतम प्रतिद्वन्द्वी एमाले समर्थित विनोद न्यौपानेले ६० मत प्राप्त गरे । स्वतन्त्र रुपमा उठेका अध्यक्षमा अर्का उम्मेदवार विष्णु खड्का ३५ मत ल्याएर तेस्रो भए ।

कूल मतदाता २०२ थिए । त्यसमध्ये १८४ मत खसेको थियो । उपाध्यक्षमा एमाले समर्थित प्रमिला पौडेल गौतम विजयी भएकी छन् ।

सचिवमा माओवादी समर्थित सरस्वती रिजाल निर्वाचित हुँदा सहसचिवमा कांग्रेस समर्थित अर्जुन पौडेल विजयी भए ।

कोषाध्यक्षमा पनि माओवादी र कांग्रेसका साझा उम्मेदवार रामकृष्ण भेटवाल निर्वाचित भए ।

सदस्यहरुमा कांग्रेस र माओवादी समर्थित समर्थित सदन राई र सकुन्तला भट्ट निर्वाचित भए ।

बाँकी सदस्यहरुमा एमाले समर्थित बिनुका शेर्पा, समिर गौतम, विकास विश्वकर्मा र डल्ले गुरुङ निर्वाचित भए ।