काठमाण्डू, यस वर्षको वसन्तकालीन आरोहण याम सगरमाथामा नयाँ इतिहास रच्ने दिशातर्फ उन्मुख देखिएको छ ।
बुधबार मात्रै एकै दिन २७४ जना आरोहीले विश्वको सर्वोच्च शिखर सगरमाथाको सफल आरोहण गरेका छन् ।
पर्वतारोहण क्षेत्रमा यो सङ्ख्या हालसम्मकै सबैभन्दा ठूलो एकदिने सफल आरोहणका रूपमा दर्ज भएको छ ।
वैशाख ३० गते सगरमाथा आरोहणका लागि ‘रुट फिक्सिङ’ सम्पन्न भएसँगै आरोहण औपचारिक रूपमा शुरु भएको थियो ।
त्यसयता मौसम अनुकूल बनेका सीमित दिनहरूमा आरोहीहरूको चाप उल्लेखनीय रूपमा बढेको छ ।
पछिल्लो एक सातामै सयौँ आरोही शिखरतर्फ उक्लिएका छन् भने बुधबार मौसम केही खुला बनेपछि स्वदेशी तथा विदेशी आरोहीहरूको ठूलो समूहले एकै दिन चुचुरो चुम्न सफल भएको हो ।
पर्वतारोहण सञ्चालक सङ्घका महासचिव ऋषिराम भण्डारीका अनुसार यसअघि करिब १४० जना आरोही सफलतापूर्वक शिखर पुगेर आधार शिविर फर्किसकेका थिए ।
बुधबार थप २७४ जनाले आरोहण पूरा गरेसँगै यस वर्षको सगरमाथा सिजन अत्यन्त व्यस्त र सफल बन्ने संकेत देखिएको उनले बताए ।
उनका अनुसार पछिल्ला दुई दिनयता उच्च हिमाली क्षेत्रमा हिमआँधी र तेज हावाको प्रभाव बढे पनि मौसमले साथ दिए आगामी दिनमा अझ धेरै आरोही शिखर पुग्ने सम्भावना छ ।
यस वर्ष सगरमाथामा अहिलेसम्मकै धेरै आरोहीले सफल आरोहण गर्ने नयाँ कीर्तिमान बन्न सक्ने अनुमान पर्वतीय पर्यटन व्यवसायीहरूले गरेका छन् ।
सगरमाथासँगै अन्य प्रमुख हिमालहरूमा पनि आरोहण गतिविधि तीव्र बनेको छ ।
ल्होत्से हिमालमा ५० भन्दा बढी तथा नुप्से हिमालमा १६ जनाभन्दा बढी आरोहीले सफल आरोहण गरिसकेका छन् ।
पर्यटन विभागका अनुसार यस सिजनमा ल्होत्सेका लागि १४३ र नुप्सेका लागि ५६ वटा आरोहण अनुमति जारी गरिएको छ ।
पर्यटन विभागको तथ्याङ्कअनुसार यस वर्ष सगरमाथा आरोहणका लागि मात्रै ४९४ जनाले अनुमति लिएका छन्, जुन हालसम्मकै उच्च सङ्ख्या हो ।
प्रत्येक आरोहीसँग सहयोगी शेर्पा टोली पनि रहने भएकाले सगरमाथा क्षेत्रमा सक्रिय आरोही र सहयोगीहरूको सङ्ख्या झण्डै एक हजार पुग्ने अनुमान गरिएको छ ।
यसअघि सन् २०२१ मा ४०८, २०२२ मा ३२५, २०२३ मा ४७८, २०२४ मा ४२१ र २०२५ मा ४५६ जनाले सगरमाथा आरोहण अनुमति लिएका थिए ।
यस वर्ष भने ती सबै रेकर्ड पार गर्दै नयाँ उच्च सङ्ख्या कायम भएको विभागले जनाएको छ ।
यसपटक नेपालसहित ५५ देशका आरोहीले सगरमाथा आरोहण अनुमति लिएका छन् ।
तीमध्ये चीनबाट सबैभन्दा धेरै १०९ जना रहेका छन् । त्यसपछि अमेरिकाबाट ७७, भारतबाट ६१, बेलायतबाट ३२, रसियाबाट १८ र जापानबाट १२ जना आरोही रहेका छन् ।
विभागले यस याममा छ हजार मिटरभन्दा अग्ला ३० वटा हिमालका लागि आरोहण अनुमति जारी गरेको जनाएको छ ।
सगरमाथापछि ल्होत्से, अमादब्लम, मकालु र नुप्से हिमालमा सबैभन्दा बढी आरोहीको आकर्षण देखिएको छ ।
