काठमाण्डू, ज्यान मार्ने उद्योगमा दोषी ठहर भई जेलमा रहेका गण्डकी प्रदेशका निलम्बित सांसद राजीव गुरुङ ‘दीपक मनाङे’को कैद सजायमा २० प्रतिशत छुट दिन काठमाडौं जिल्ला अदालतले आदेश दिएको छ ।
जिल्ला अदालत काठमाडौंका न्यायाधीश कमलप्रसाद पोखरेलको इजलासले मनाङेलाई २० प्रतिशत छुट दिएको हो ।
मनाङेले यही फागुन १२ गते मुलुकी ऐन दण्ड सजायको ४१ (क) अनुसार २० प्रतिशत छुटका लागि निवेदन दिएका थिए । सोही निवेदनअनुसार २० प्रतिशत छुट दिन आदेश दिएको हो ।
मनाङे गत कार्तिकमा काठमाडौंको सानोभर्याङबाट पक्राउ परेका थिए । अहिले उनी डिल्लीबजार जेलमा छन् ।
२ वर्ष ४ महिना जेल सजाय काट्नुपर्नेमा अब सजाय छुटपश्चात् मनाङेले १ वर्ष ४ महिना मात्रै कैद भुक्तान गर्नुपर्नेछ ।
