काठमाण्डू, नेपाली कांग्रेसको देउवा पक्षले विशेष महाधिवेशनबाट सभापति बनेका गगन थापा नेतृत्वको कार्यसमितिलाई अधिकारिकता प्रदान गर्ने सर्वोच्च अदालतको फैसलालाई स्वीकार गर्ने निष्कर्ष निकालेको छ ।
शनिबार बसेको देउवा पक्षको बैठकले अदालतको फैसला स्वीकार गर्ने निर्णय गरेको हो ।
देउवा पक्षका कांग्रेस नेता मिन विश्वकर्माले पार्टीभित्र मतभेद रहे पनि स्वतन्त्र न्यायपालिकाको निर्णयलाई स्वीकार गर्ने परम्परा अनुसार फैसला स्वीकार गर्ने निष्कर्ष निकालेको बताए ।
उनका अनुसार नेपाली कांग्रेसले न्यायालयले गरेका निर्णयलाई सधैं आत्मसात गर्दै आएको उल्लेख गर्दै यसपटक पनि फैसलाप्रति असन्तुष्टि भए पनि त्यसलाई स्वीकार गर्ने निर्णय गरिएको छ ।
उनले सर्वोच्च अदालतको राजनीतिक दलसम्बन्धी ऐनको व्याख्याप्रति देउवा पक्षमा केही असन्तुष्टि रहेको बताए । यद्यपि, पार्टीभित्र अझै पनि विभिन्न मतभेद रहेको उनको भनाइ थियो ।
नेता विश्वकर्माले देशभर पार्टी एकताप्रति चिन्ता व्यक्त भइरहेको बताउँदै सबै पक्ष पार्टीलाई कसरी अघि बढाउने भन्ने विषयमा केन्द्रित रहेको बताए ।
उनले कांग्रेस सभापति गगन थापा रहेको उल्लेख गर्दै पार्टी एकताको निष्कर्षमा पुग्ने जिम्मेवारी पनि उनकै काँधमा रहेको बताए ।
