काठमाण्डू, चाइनिज ताइपेईमा जारी एएफसी यू–२० एसियन कप छनोटको समूह ‘बी’ मा नेपालले आज बहराइनको सामना गर्दैछ ।
नेपाल र बहराइनबीचको खेल नेपाली समय अनुसार दिउँसो पौने १ बजे न्यु ताइपेई सिटीस्थित फु जेन क्याथोलिक युनिभर्सिटी स्टेडियममा सुरु हुनेछ ।
समूह ‘बी’ मा नेपालले अहिलेसम्म एउटा खेल मात्र जित्न सकेको छ । नेपालले पहिलो र तेस्रो खेलमा क्रमशः कम्बोडिया र उज्वेकिस्तानसँग पराजय बेहोर्दा चाइनिज ताइपेइलाई हराएको थियो ।
पाँच टोली सहभागी समूह ‘बी’ मा नेपाल ३ खेलबाट ३ अंकसहित चौथो स्थानमा छ ।
समूहको शीर्ष स्थानमा रहेर अर्को वर्ष चीनमा हुने एएफसी यू–२० एसियन कपमा छनोट हुने नेपालको सम्भावना सकिएको छ ।
