काठमाण्डू, साफ यू–२० च्याम्पियनसिपको उपाधिका लागि नेपालले आज बंगलादेशसँग खेल्दैछ ।
यी दुई टिमबीचको फाइनल प्रतिस्पर्धा दिउँसो साढे २ बजेदेखि सातदोबाटोस्थित एन्फा कम्प्लेक्सको मैदानमा सुरु हुनेछ ।
नेपाल तेस्रो तथा बंगलादेश चौथोपटक फाइनल खेल्न लागेका हुन् । यसअघि बंगलादेशले सन् २०१७, २०१९ र २०२२ को फाइनल खेलेको थियो ।
यस्तै, नेपालले सन् २०१५ र २०१७ साफ फाइनलमा प्रतिस्पर्धा गर्यो ।
नेपाल हालसम्म फाइनल पुगेको दुवै संस्करणमा च्याम्पियन भएको इतिहास छ । बंगलादेश भने फाइनल पुगेको तीनवटै संस्करणमा पराजित भएको विगत छ ।
जारी साफ च्याम्पियनसिपको सेमिफाइनलमा नेपालले भुटान तथा बंगलादेशले भारतलाई पेनाल्टी सुटआउटमा हराए ।
प्रतियोगितामा अहिलेसम्म नेपाल अपराजित छ । नेपालले समूह चरणमा श्रीलंकालाई १–० तथा बंगलादेशलाई २–१ ले हरायो ।
यस्तै, नेपालले सेमिफाइनलमा भुटानलाई पेनाल्टी सुटआउटमा ४–१ ले पाखा लगायो ।
यस्तै, बंगलादेशले समूह चरणमा नेपालसँग पराजय बेहोर्दा श्रीलंकालाई २–० ले हरायो ।
बंगलादेशले सेमिफाइनलमा डिफेन्डिङ च्याम्पियन भारतविरुद्ध पेनाल्टी सुटआउटमा ४–३ को जित निकाल्यो ।
भारतसँगको जीतपछि उत्साहित बंगलादेशी टिम नेपाललाई पनि हराएर पहिलोपटक उपाधि जित्न चाहन्छ ।
यता नेपाल बंगलादेशसँगको अपराजित यात्रा कायम राख्दै तेस्रोपटक साफ च्याम्पियन बन्ने योजनामा छ ।
हालसम्म २० वर्षमुनिको साफमा नेपाल र बंगलादेश चारपटक आमनेसामने भएका छन्, जसमा नेपालले तीन र बंगलादेशले एक खेल जितेको छ ।
यी दुई टिमबीचको पहिलो भेट सन् २०१५ को साफमा भएको थियो । उक्त प्रतियोगितामा नेपालले बंगलादेशलाई २–१ ले हरायो ।
यस्तै, यी दुई टिमले दोस्रो खेल सन् २०१७ को साफमा खेले । जहाँ नेपालले बंगलादेशविरुद्ध २–१ कै जीत निकाल्यो । नेपाल र बंगलादेशबीच तेस्रो प्रतिस्पर्धा सन् २०२२ को साफ सेमिफाइनलमा भयो ।
उक्त खेलमा भने बंगलादेशसँग नेपाल पेनाल्टी सुटआउटमा पराजित भयो ।
यी दुई टिमले तेस्रोपटक जारी साफमा एकअर्काको सामना गरे, जहाँ नेपालले बंगलादेशलाई २–१ ले हरायो ।
हालसम्म साफमा बंगलादेशविरुद्ध तीनपटक जीत निकाल्दा तीनैपटक २–१ को नतिजा हात पारेको छ ।
नेपाल बुधबार पनि सोही नतिजा दोहोर्याउँदै सर्वाधिक साफ उपाधि जित्ने मामलामा भारतको रेकर्ड बराबर गर्न चाहन्छ ।
हालसम्म उमेर समूहको साफमा सबैभन्दा बढी उपाधि जित्ने रेकर्ड भारतको नाममा छ । ऊ तीन पटकको च्याम्पियन टिम हो ।
यद्यपि यसपालि भने भारत सेमिफाइनलबाटै घर फर्किएको छ ।
