काठमाण्डू, नेपालको एपीएफ क्लबले पहिलो पटक हुन लागेको एएफसी वुमन्स च्याम्पियनसिपमा सहभागिता जनाउँदै छ ।
एसिया फुटबल महासंघ (एएफसी) ले पहिलो पटक एएफसी वुमन्स च्याम्पियन्स लिग आयोजना गर्न लागेको हो ।
पहिलो संस्करण यस प्रतियोगिताको प्रारम्भिक चरणमा नेपालबाट एपीएफ क्ललबे प्रतिस्पर्धा गर्दैछ ।
जुन नेपाली क्लबका लागि इतिहास हो । नेपालमा महिला लिग च्याम्पियनको रुपमा एपीएफले यस प्रतियोगिता खेल्ने अवसर पाएको हो ।
घरेलु फुटबल कमजोर भइरहेको अवस्थामा पछिल्लो समय महिला फुटबलले अन्तर्राष्ट्रियस्तरमा राम्रो प्रदर्शन गरिरहेको छ ।
अहिले एपीएफले महादेशीयस्तरको क्लब प्रतियोगिता खेल्नु नेपाली फुटबलकै लागि उपलब्धी हो ।
पहिलो पटक हुन लागेको महादेशीयस्तरको प्रतियोगिता खेल्ने एपीएफ टोली निकै उत्साहित छ ।
क्लब प्रतियोगिता भएपनि देशकै प्रतिनिधित्व हुनेछ । ‘जुनियर, सिनियर खेलाडीहरु छन् ।
हामी एकदम उत्साहित छौँ’, एपीएफकी कप्तान अनिता बस्नेतले मलेसिया जानुअघि अनलाइनखबरसँग भनिन् ।
यस्तै एपीएफका प्रशिक्षक राजेन्द्र तामाङले पनि पहिलो पटक खेल्न लागेको ठूलो उत्साह रहेको बताए । ‘मलाई जिम्मा दिए ।
पहिला पुरुष टिममा काम गरेको । महिला पनि नेसनल टिममा काम गरेको भएर अहिले त्यही टिमलाई एपीएफमा सेट बनाएको छु ।
पुलिस आर्मीबाट पनि २-२ जना खेलाडी थपेका छौँ’, उनले अनलाइनखबरसँग भने, ‘पहिलो पटक वुमन्स च्याम्पियन्स लिग खेल्न लागेकोले खेलाडीहरु पनि उत्साहित छन् । म पनि उत्साहित छु ।’
प्रतियोगिताको लागि अनिता बस्नेतको कप्तानीमा रहेको एपीएफ टोली बिहीबार मलेसिया प्रस्थान गरिसकेको छ ।
एपीएफले आइतबार (आज) उज्वेकिस्तानको नासाफसँग खेल्नेछ । यस्तै समूहको दोस्रो खेलमा एपीएफले मलेसियन टोली साबाहसँग बुधबार प्रतिस्पर्धा गर्नेछ ।
नासाफ र साबाहबीच अर्को साता शनिबार खेल हुनेछ । प्रारम्भिक चरणमा १४ टोलीलाई चार समूहमा विभाजन गरिएको छ ।
प्रत्येक समूहको विजेता टोली अन्तिम चरणमा छनोट हुनेछ ।
च्याम्पियन्स लिगको अन्तिम चरण अक्टोबर ६ देखि १२ सम्म हुनेछ । जसमा शीर्ष १२ टोलीले प्रतिस्पर्धा गर्नेछन् ।
एपीएफ टिम र तयारी
राष्ट्रिय टिमकी कप्तान एन्जिला तुम्बापोसहित अधिकांश खेलाडी एपीएफ टिममा रहेकोले अहिले छिमको तयारी राम्रो भएको प्रशिक्षक र कप्तानको भनाइ छ । कप्तान अनिताले टिमको तयारी राम्रो भएको बताइन् ।
एपीएफमा राष्ट्रिय टिमकै अधिकांश सदस्यहरु रहेकोले पनि राष्ट्रिय टिमको तयारीले गर्दा यस पटक लामो समयमको तयारी भएको अनिताको भनाइ छ ।
‘हाम्रो निरन्तर खेलिराको र राष्ट्रिय टिममा पनि सँगै खेलिराको भएर टिम राम्रो बनेको छ । हरेक पोजिसनमा खेलाडी थप गरेका छौँ’, उनले भनिन् ।
एपीएफमा हाल राष्ट्रिय टिमका १३ खेलाडी छन् । यस्तै पूर्वकप्तान अनु लामा पनि टिममा छन् भने यसै प्रतियोगिताको लागि भनेर एपीएफले अन्य टोलीबाट चार खेलाडी थप समेत गरेको छ ।
राष्ट्रिय टिमको पहिलो रोजाइमै खेल्ने एन्जिलासहित डिफेण्डर गीता राना, हिरा भुजेल, मिडफिल्डर सरु लिम्बू, रेनुका नगरकोटी, प्रीति राई, फरवार्ड सविता राना मगर, रश्मीकुमारी घिसिङजस्ता खेलाडी एपीएफकै हुन् ।
त्यसमा च्याम्पियन्स लिगकै लागि भनेर एपीएफले त्रिभुवन आर्मी क्लबबाट मिडफिल्डर दिपा शाही र फरवार्ड अमिसा कार्की तथा नेपाल पुलिस क्लबबाट गोलकिपर उषा नाथ र डिफेण्डर अमृता जैशीलाई अनुबन्ध गरेको छ ।
उषा बाहेक बाकी खेलाडी राष्ट्रिय टिममा समेत पहिलो रोजाइमै खेल्ने खेलाडी हुन् ।
चार खेलाडी थप गर्दा टिम राम्रो बनेको प्रशिक्षक तामाङले बताउँछन् । ‘नयाँ खेलाडी नभएको भएर एक अर्कालाई चिन्छन् ।
दुई विभागको प्लेअर आउँदा राम्रो हुन्छ’, उनी भन्छन्, ‘मैले सबेको नाम खेल्ने तरिका चिनेको छु मुख्य कुरा भनेको मेरो फिलोसोफी के हो बुझेको छ । स्टाइल अफ प्ले पनि बुझेको छ ।’
यस्तै प्रीति राई पनि टिममा समावेश भएपछि कम्बिनेसन अझ राम्रो बनेको तामाङले बताए । ‘उ आउनेबित्तिकै यता सबै चेन्ज भयो ।
अहिले प्रीतिको क्वालिटी राम्रो छ । उ भएपछि अट्यकिङमा राम्रो छ गोल हान्ला नहान्ला ठिक छ । मैले अनिता र रश्मीलाई प्रयोग गरिराछु अनु लामा अनुभवी छ’, उनले भने ।
यसअघि प्रीति साउदीमा लिग खेल्न जाने भनेपनि अन्तिम समयम गइनन् । उनले एपीएफबाट खेल्ने भएपछि टिम पनि उत्साहित छ ।
बर्खाका कारण तयारी राम्रोसँग गर्न नपाएको तामाङले बताए । ‘हामीले जुलाई १४ बाट प्रशिक्षण सुरु गरेको छ ।
तर, पीडा भन्ने कि क भन्ने पानी धेरै पर्यो । यू२० र चर्च ब्वाइजको ट्रेनिङले गर्दा एन्फा कम्प्लेक्स माग गरेपनि पाएनौँ ।
यहीँ गर्दा हिलो भयो । पहिला ठिकै थियो पछि समस्या भयो । चिप्लिने बल कन्ट्रोल नहुने जस्ता समस्या भयो’,’ तामाङले भने ।
उनले अगाडि भने, ’जुन तरिकाले जान खोजेको त्यो गर्न दिएन । अट्याक गर्दा पनि लग्यो लग्यो अनि रोकिन्छ जुन पेसमा जान पर्ने भएन । हिलोले चुनौती भयो ।’
लक्ष्य अन्तिम चरण
एपीएफ रहेको समूह सी मा तीन टोली मात्र छ । एपीएफले प्रारम्भिक चरणमा उत्कृष्ट प्रदर्शन गर्दै अन्तिम चरणमा पुग्ने लक्ष्य बनाएको छ ।
हाम्रो लक्ष्य अन्तिम चरणमा पुग्ने नै हो । सकिन्छ सकिन्न त्यो आफ्नो ठाउँमा छ’, प्रशिक्षक तामाङले भने ।
प्रशिक्षक तामाङले नासाफसँग पहिलो खेलमा अंक लिन सके सजिलो हुने बताए ।
‘हामीले नासाफसँग खेल्दा एउटा राम्रो योजना बनाएर ३ वा १ नम्बर लिन सक्यो भने सहज हुन्छ ।
त्यहाँ जित्न सक्यो भने राम्रो हुन्छ । सजिलो हुन्छ’, उनले भने । प्रशिक्षक तामाङले टिमको स्ट्राइकङमा भने केही समस्या रहेको बताए ।
उनले नेपाली फुटबलकी गोल मेसिन साम्बा नहुँदा समस्या भएको बताए ।
त्यसको विकल्पमा फरवार्डमा अनिता केसी र रश्मी घिसिङलाई तयार पारिरहेको बताए ।
कप्तान अनिताले पनि यो राम्रो अवसर रहअकोले अन्तिम चरणमा पुग्ने लक्ष्य नै रहेको बताए । ‘यसलाई मैले राम्रो अवसरको रुपमा लिएको छ ।
हाम्रो टार्गेट त अन्तिम चरणमा पुग्ने नै हो’, उनले भनिन्, ‘दुई खेल खेल्छौँ विपक्षी जति बलियो भएपनि डोमिनेट गरेर खेल्नेर् र अन्तिम चरणमा पुग्ने हो ।
मलेसियन भन्दा उज्वेक टिम अली बलियो छ। त्यही अनुसार कोचले रणनीति बनाउने हो । हामी त्यही अनुसार म्याच खेल्नेछौँ ।’
नेपालले आगामी अक्टोबरमा साफ महिला च्याम्पियनसिप घरेलु मैदानमा खेल्दैछ । त्यसका लागि यो प्रतियोगिता राम्रो तयारी हुने प्रशिक्षक तामाङले बताए ।
यो प्रतियोगिताले धेरै अर्थ राख्छ । मैले खेलाडीलाई पनि त्यही कुरा गरिराछु । हामी अहिले क्लब प्रतियोगिता खेल्न जान्छौँ ।
तर, हाम्रो टार्गेट साफको लागि छ । साफमा जित्नको लागि यहाँ राम्रो खेल्नुपर्यो । यहाँ राम्रो खेलेपछि साफमा कन्फिडेन्ट बढ्छ’, उनले भने ।
साम्बा नहुँदा घाटा
नेपाली क्लबले महादेशीयस्तरमा यति ठूलो प्रतियोगिता खेल्दा नेपाली फुटबलकी स्टार र गोलमेसिन सावित्रा भण्डारी साम्बा भने हुने छैनन् ।
उनी व्यावसायिक फुटबल खेल्न हाल फ्रान्समा छिन् । प्रशिक्षक तामाङले साम्बा बेस्ट स्ट्राइकर भएकोले उनी नहुँदा असर त पर्ने बताए ।
साम्बा नहुँदा असर पर्छ किनभने उ ‘वान अफ दि बेस्ट स्ट्राइकर’ हो । उसँग स्किल र क्वालिटी छ’, तामाङले भने ।
साम्बा गोल गर्ने खेलाडी भएकोले उनी नहुँदा त्यसमा फरक पर्ने बताए ।
उनले भने, ‘उसको काम गोल गर्ने हो जसरी पनि गोल गर्छ । उसले वाफमा ९ गोल गर्यो । त्यसले गर्दा उ नहुँदा फरक चाही पर्छ ।’
साम्बा नहुँदा अर्को योजना बनाएर अघि बढ्नुपर्ने तामाङले बताए । मसँग साम्बा छैन भने मैल त्यसमा काम गर्नुपर्यो ।
स्ट्राइकरमा काम गर्न पर्यो । अट्याकिङ मिडफिल्डर नम्बर नाइन र विंगरले पनि गोल गर्न सक्छ भनेर तयार पार्न पर्यो ।’
यस्तै कप्तान अनिताले पनि साम्बा टिममा चाहिने प्लेहर भएकोले मिस हुने बताइन् ।
अरु जुनियर खेलाडीहरु पनि राम्रो रहेकोले उनको अभाव हुन नदिने बताइन् । ‘साम्बा टिमलाई चाहिने प्लेअर हो ।
उ नहुँदा अली मिस त हुन्छ । नयाँ बहिनीहरु पनि क्वालिटी छ’, उनले भनिन्, ‘साम्बा जस्तो क्षमता त नहोला ।
हामी टिम स्प्रिट र टिम वर्क गर्दै साम्बा नभएको महसुस हुन दिँदैनौँ भन्ने लक्ष्य छ ।’
