एजेन्सी, चौथो संस्करणको ग्लोबल टी–२० क्यानडा लिगको उपाधि नेपाली कप्तान रोहितकुमार पौडेलआबद्ध टोरन्टो नेसनल्सले जितेको छ ।
गएराति सम्पन्न फाइनल खेलमा डिफेन्डिङ च्याम्पियन मोन्ट्रियल टाइगर्सलाई ९ विकेटले हराउँदै टोरन्टोले उपाधि जितेको हो ।
उसले पहिलोपटक ग्लोबल टी–२० को उपाधि जितेको हो । फाइनलमा मोन्ट्रियलले दिएको ९७ रनको झिनो लक्ष्य टोरन्टोले १५ ओभरमा २ विकेट गुमाएर पूरा गर्यो ।
उसका लागि एन्ड्रिज गौसले ४९ बलमा ८ चौकासहित अविजित ५५ रन बनाए । यस्तै, रस्सीभानडर दुसेनले अविजित ३० रन जोडे ।
मोन्ट्रियलका लागि अजमातुल्लाह उमरजाई र कर्बिन बोशले मात्र एकरएक विकेट लिए ।
त्यसअघि टस हारेर ब्याटिङको निम्तो पाएको मोन्ट्रियलले निर्धारित २० ओभरमा ९ विकेट गुमाएर ९६ रन बनायो ।
उसका लागि कर्बिन बोशले ३५, जसकरण सिंहले १६ र अनूप रविले १० रन बनाए । बाँकी ब्याटरले भने दोहोरो अंकमा समेत जोड्न सकेनन् ।
टोरन्टोका लागि जेसन बेहरेन्डोर्फले तीन, रोमारियो सेफर्डले दुई तथा जुनैद सिद्दिकी, मोहम्मद नवाज, निखिल दत्त र जतिन्दरपाल मथारुले एकरएक विकेट लिए ।
टोरन्टोमा आबद्ध रोहितले भने फाइनल खेलमा पनि प्लेइङ–११ मा मौका पाएनन् । यस सिजनमा टोरन्टोले कुल १० म्याच खेल्दा उनले दुई खेलमा मात्र प्लेइङ–११ मा मौका पाए ।
यद्यपि रोहित आफ्नो पहिलो सिजनमै च्याम्पियन टिमको सदस्य भने बने । यसपालि अरू नेपाली खेलाडी सन्दीप लामिछाने र दीपेन्द्र सिंह ऐरी भ्यानकुभर नाइट्समा आबद्ध थिए ।
उनीहरूआबद्ध भ्यानकुभरले खराब प्रदर्शन गर्यो । ऊ तालिकाको पुछारमा रहँदै लिग चरणबाटै बाहिरिएको थियो ।
