काठमाण्डू, नेपाली क्रिकेट टिमका कप्तान रोहितकुमार पौडेलआबद्ध टोरन्टो नेसनल्सले क्यानडामा जारी ग्लोबल टी–२० मा लगातार दोस्रो जीत निकालेको छ ।
टोरन्टोले दोस्रो जित दर्ता गर्नेक्रममा आइतबार बिहान सम्पन्न खेलमा ब्राम्टन वोल्भ्सलाई ८ विकेटले हरायो ।
उसले पहिलो खेलमा सन्दीप लामिछाने र दीपेन्द्रसिंह ऐरीआबद्ध भ्यानभुकर नाइट्सलाई पनि ८ विकेटले नै हराएको थियो ।
दोस्रो खेलमा ब्राम्टनले दिएको १ सय ११ रनको लक्ष्य टोरन्टोले १३.२ ओभरमा २ विकेट गुमाएर पूरा गर्यो ।
उसका लागि उन्मुक्त चन्दले ४० बलमा आठ चौका र एक छक्कासहित सर्वाधिक ५३ रन बनाए । शीर्षक्रमका ब्याटरले उत्कृष्ट प्रदर्शन गरेपछि रोहितले भने ब्याटिङमा मौका पाएनन् ।
यद्यपि उनले सानदार फिल्डिङ गरे । रोहितले १५औँ ओभरको अन्तिम बलमा बाउन्ड्री लाइनमा सानदार क्याच प्रक्रिए ।
यदि आफूलाई नियन्त्रणमा राख्न नसकेको भए उक्त बल छक्कामा परिणत हुने सम्भावना प्रवल थियो ।
तर, रोहितले सुझबुझ तरिकाले लिएको क्याच भित्र फाल्दै आफू बाउन्ड्री बाहिर गए । र, तत्काल नै बाउन्ड्रीभित्र फर्किँदै उनले उत्कृष्ट क्याच पक्रिए ।
रोहितले अखिलकुमारको क्याच लिएका हुन् । यस्तै, रोहितले दोस्रो ओभरको चौथो बलमा आक्रामक ब्याटर आरोन जोनसनलाई शून्यमै रनआउट गर्दै पवेलियन फर्काए ।
कुनै पनि विदेशी लिगमा रोहितको यो डेब्यू खेल हो । उनले ढिला भिषा पाएका कारण पहिलो खेल गुमाएका थिए ।
रोहितआबद्ध टोरन्टो लगातार दुई जीतका साथ अहिले तालिकाको शीर्ष स्थानमा छ ।
सन्दीप र दीपेन्द्रआबद्ध भ्यानकुभरले भने लगातार दोस्रो हार बेहोरेको छ । दोस्रो हार बेहोर्नेक्रममा ऊ शनिबार रातिको खेलमा बंग्ला टाइगर्स मिसिसौगासँग २२ रनले पराजित भयो ।
