काठमाडौं, नेपालले भारतमा फ्रेण्डसीप कप टी–२० क्रिकेटको उपाधि जितेको छ।
आइतबार भएको फाइनलमा नेपालले गुजरातलाई १८ रनले पराजित गरेको हो। १७७ रनको लक्ष्यमा जवाफी ब्याटिङ गरेको गुजरात निर्धारित ओभरमा ८ विकेट गुमाएर १५८ रन मात्र बनाउन सक्यो ।
नेपालका लागि अभिनाष बोहराले ३ र दीपेन्द्र सिंह ऐरीले २ विकेट लिए । पहिले ब्याटिङ गरेको नेपालले पूरै ओभर खेलेर ४ विकेटको क्षतिमा १७६ रन बनायो।
नेपालका लागि रोहित कुमार पौडेलले अर्धशतकीय पारी खेले । कप्तान पौडेलले ७४ रन बनाए। उनले ४७ बलमा ५ चौका र ४ छक्का प्रहार गरे।
आसिफ शेखले ३४, कुशल भूर्तेलले १९ र दीपेन्द्र सिंह ऐरीले ७ रन बनाए। कुशल मल्ल ३१ र सन्दीप जोरा ७ रनमा अविजित रहे। गुजरातका लागि शेन पटेल र तेजस पटेलले १–१ विकेट लिए।
भारतमा नेपालले कुल ५ खेल खेलेकोमा बरोडासँग एक खेलमा पराजित भएको थियो । नेपाल टि(२० विश्वकपको तयारीका लागि गुजरात गएको हो ।
