सिन्धुपाल्चोक/पाँचथर, सिन्धुपाल्चोक र पाँचथरमा पहिरोले घर बगाउँदा चारजनाको मृत्यु भएको छ।
३६ घण्टायता लगातार भइरहेको वर्षाका कारण आएको बाढीले घर पुरिँदा जिल्लाको लिसंखुपाखर गाउँपालिका ३ का पूर्वडाध्यक्ष काजीबहादुर लामा र उनकी पत्नीको मृत्यु भएको हो ।
गाउँपालिका अध्यक्ष राजु लामाका अनुसार राति १ बजेतिर आएको पहिरोले घर पुरिँदा उनीहरूको मृत्यु भएको हो ।
स्थानीय राति नै उद्धारमा पुगेका थिए तर, उनीहरू भने बचेनन् । यसैबीच पाँचथरमा पहिरोमा पुरिएर आमाछोरीको मृत्यु भएको छ।
निरन्तरको वर्षाका कारण खसेको पहिरोमा परी पुरिँदा फिदिम नगरपालिका–४ चिसापानीमा बस्दै आएका फिदिम नगरपालिका–१२ का २५ वर्षीया सपना शेर्पा र उनकी छोरी पाँच वर्षीया डोल्माको मृत्यु भएको हो।
उनीहरूसँगै रहेका अन्य तीन जना भने भागेर बाँच्न सफल भएका छन्।
पहिरोमा परी आज बिहान ३ः४५ तिर दुवैजनाको मृत्यु भएको प्रहरीले जनाएको छ। मृतकहरूको शव स्थानीयवासीको सहयोगमा प्रहरीले पहिरोबाट निकालेको छ।
पहिराले यहाँ रहेको नेपाल आदिवासी जनजाति महासङ्घको भवन पनि पुरेको जिल्ला प्रहरी कार्यालय पाँचथरले जनाएको छ।
रासस
