बनेपा, अविरल वर्षासँगै सडकमाथिबाट झरेको लेदोको कारण अवरुद्ध भएको वीपी राजमार्ग एकतर्फी रुपमा सञ्चालनमा आएको छ ।
शुक्रबार बिहान करिब ९ः१५ को समयमा वर्षासँगै आएको लेदोको कारण वीपी राजमार्ग अन्तर्गत रोसी गाउँपालिका –८ चारसय बेंसीमा सडक अवरुद्ध भएको थियो ।
जिल्ला प्रहरी कार्यालय काभ्रेपलाञ्चोकका सूचना अधिकारी प्रहरी नायब उपरीक्षक राजकुमार श्रेष्ठले अविरल वर्षासँगै आएको लेदोका कारण अवरुद्ध भएको सडक विभाग र स्थानीय सरकार र प्रहरीको सहायतामा एकतर्फी रुपमा सञ्चालनमा आएको बताए ।
उनले एकतर्फ बाटो सञ्चालनमा आउँदा राजमार्गमा सवारी आवागमनमा समस्या भएका कारण दुवैतर्फको बाटो सञ्चालनका लागि सडक विभाग र स्थानीय सरकारसँग समन्वय भइरहेको बताए ।
वर्षा सुरु भएसँगै वीपी राजमार्गको चार सयबेंसी, माम्ती, कालढुङ्गालगायतका स्थानमा आउने खहरे खोलाका कारण पटक–पटक घण्टौँसम्म राजमार्ग अवरुद्ध हुने गरेको छ ।
