भद्रपुर, झापाको कचनकवल गाउँपालिका वडा नम्बर-१ घेराबारीमा भारतीय पक्षले दशगजामा बाटो खनेपछि विवाद उत्पन्न भएको छ ।
दिउँसो नेपाली स्थानीयले अवरोध गरेपछि बन्द भएको बाटो खन्ने काम आइतबार बिहानको रातिबाट शुरु गरेको कचनकवल गाउँपालिका वडा नम्बर-१ का वडाध्यक्ष महावीर लिम्बूले बताए ।
शनिबार दिउँसोबाट भारतीहरूले दशगजामा बाटो खनेकोमा स्थानीयले दिउँसै अवरोध गरेका थिए ।
दशगजा क्षेत्रमै भारतीय नागरिकले बाटो खन्न थालेपछि नेपाली नागरिकहरूले बाटो खन्न अवरोध गरेको कचनकवल गाउँपालिकाका अध्यक्ष कलेन्द्रप्रसाद सिंह राजवंशीले बताए ।
दशगजामा बाटो खनेको भन्दै नेपाली स्थानीयले अवरोध गरेपछि विवाद उत्पन्न भएको हो । दुई देशबीचको सिमानाको १० गज खाली राख्नु पर्ने अन्तर्राष्ट्रिय नियम छ ।
उनका अनुसार घेरावारिमा १ सय ५० मिटर लामो बाटो दशगजामा भारतीयहरूले खनेका छन् । बाटो १६ फिट चौडाइको रहेको छ ।
यसअघि पनि सो क्षेत्रमा बाटो खन्ने विषयमा विवाद उत्पन्न भएको थियो । स्थानीयले अवरोध गरेपछि अहिले बाटो खन्ने काम रोकिएको छ ।
काम रोकिए पनि खनेको बाटो भने नपुरेको लिम्बुले बताए ।
झापाका प्रमुख जिल्ला अधिकारी बन्धुप्रसाद बास्तोलाले दशगजा नजिकै सडक खनिएपछि दुवै पक्षबिच विवाद भएको बताए ।
विवाद बढेपछि काम बन्द गरेर छलफल भइरहेको बास्तोलाले बताए ।
