काठमाण्डू, नेकपा माओवादी केन्द्रकाअ अध्यक्ष पुष्पकमल दाहालले केही समयपछि फुटेर गएका माओवादीहरु पनि एकतावद्ध हुने दावी गरेका छन्।
शनिबार माओवादी केन्द्रको काठमाडौं–नुवाकोट सम्पर्क समन्वय समितिको जिल्ला भेलालाई सम्बोधन गर्दै अध्यक्ष दाहालले आफ्नो पार्टी कसैले फुटाउन नसक्ने ठोकुवा गरे।
‘हाम्रो तीनवटा प्रदेशको बैठक सकियो, म तात्तातो तपाईहरुलाई भन्दैछु,’ उनले भने, ‘कसैले हाम्रो पार्टी फुटाउन सक्दैन्। हिल्याउन सक्दैन्।
बरु हेर्नुहोला, केही समयपछि फुटेर गएका बाँकी रहेका माओवादीहरु पनि एकतावद्ध हुन्छन्। माओवादी आन्दोलन एकतावद्ध गरेर हामी अगाडी बढ्छौँ।’
माओवादीहरुलाई एकतावद्ध पार्नु नै आफ्नो लक्ष्य भएको अध्यक्ष दाहालको भनाइ छ। ‘यही हाम्रो लक्ष्य हो,’ उनले भने, ‘हाम्रो पार्टी फुटाउने षड्यन्त्र त प्रतिक्रियावादीहरुले जनयुद्धका बेला पनि गरे। पछि पनि गरेकै हुन्।
केही साथीहरु विभाजित भएर जानु पनि भएको हो। धेरैजसो फर्केर हामी एकतावद्ध भयौँ। बाँकी रहेकासँग पनि एकता, वार्ता चलिराखेको छ। छिट्टै हामी एकतावद्ध हुने प्रयासमा अगाडी बढिराखेका छौँ।’
उनले जनताको घर–आँगनमा गएर २०६४ सालको जस्तै मत ल्याउन सकिने भन्दै आगामी निर्वाचनमा माओवादी केन्द्रलाई सबैभन्दा ठूलो दल बनाउनेगरी लाग्न नेता, कार्यकर्ताहरुलाई निर्देशन समेत दिए।
फरक प्रसँगमा अध्यक्ष दाहालले आफू नेतृत्वको सरकारले भ्रष्टाचार विरुद्धको एकपछि अर्को फाइल खोल्न थालेपछि आफ्नो पालो आउने डरमा तत्कालिन सरकार ढालेर बर्तमान सरकार बनाइएको जिकिर समेत गरे।
