एजेन्सी, अमेरिकी रक्षामन्त्री लोयड अस्टिनले जाडोपछि युक्रेनले रुस विरुद्ध नयाँ प्रतिशोधात्मक हमला गर्ने दाबी गरेका छन् ।
युक्रेनका लागि सैन्य सहायतासम्बन्धी वार्तापछि पत्रकारहरूसँग कुरा गर्दै लोयड अस्टिनले युक्रेनका साझेदार राष्ट्रहरू आवश्यक परेसम्म एकजुट रहने र जाडोपछि रुसविरुद्धको आक्रमण बढ्ने बताएका बीबीसी हिन्दीले जनाएको छ ।
ब्रसेल्समा भएको नेटोको महत्वपूर्ण बैठकमा युक्रेनलाई हतियार उपलब्ध गराउने विषयमा छलफल भएको छ ।
सदस्य राष्ट्रहरूले युक्रेनलाई थप सहायता दिने विषयमा छलफल गरेका थिए।
यस बैठकपछि अमेरिकी रक्षामन्त्री लोयड अस्टिनले जाडो सकिएपछि युक्रेनले रुसविरुद्ध नयाँ जवाफी हमला गर्ने अपेक्षा गरेको बताएका छन् ।
रुसले युक्रेनमा ठूलो हवाई हमला गर्ने तयारी गरिरहेको मिडिया रिपोर्टले दाबी गरेको छ । यसै क्रममा अमेरिकाका उच्च सैन्य जनरल मार्क माइलीले यस पत्रकार सम्मेलनमा रुसको आलोचना गरेका छन् ।
मार्क माइलीले भने कि राष्ट्रपति पुटिनले छोटो समयमा युक्रेनलाई हराउने सोच्नु गलत थियो।
युक्रेनमा जारी युद्धमा रुस सैन्य परिचालन र रणनीतिक रूपमा पराजित भएको र युद्धको मैदानमा ठूलो मूल्य चुकाउनु परेको उनले बताए। यसै क्रममा नेटो प्रमुख जेन्स स्टोल्टनबर्गले रुसी राष्ट्रपति पुटिनले शान्ति ल्याउन नभई ठीक उल्टो गर्ने तयारी गरिरहेको बताएका छन् ।
नेटो प्रमुखले पुटिनले युद्धलाई थप लम्बाउने तयारी गरिरहेको बताएका छन् । ब्रसेल्समा भएको नेटो अधिकारीहरुको बैठकको आलोचना गर्दै रुसले नेटो देशहरु रुसको विरुद्धमा रहेको बताएको छ ।
