२०८१ साउन ४ शुक्रवार | Friday, Jul 19 2024

कर्णाली प्रदेशका हिमाली जिल्लामा हिमपातसँगै बर्षा

Nabil Bank

कर्णाली प्रदेशका हिमाली जिल्लाहरुमा हिउँपर्न सुरु भएको छ। यस बर्ष माघ महिनाको मध्यसम्म पनि हिउँ नपर्दा चिन्तित किसानहरु अहिले बाक्लो हिउँ पर्न थालेपछि उत्साहित भएका छन्। मंगलबार बिहान करिब ५ बजेदेखि जुम्लामा हिउँ पर्न थालेपछि किसान हर्षित भएका हुन ।

यहाँका हिमाली जिल्ला जुम्लासहित मुगु, हुम्ला र डोल्पामा समेत हिमपातसँगै वर्षा भइरहेको छ । उता कालिकोट, सुर्खेत, दैलेखमा पनि भीषण वर्षा भइरहेको छ । हिउँ कुरिरहेका कर्णालीका किसान मङ्गलवार बिहानैदेखि हिउँ पर्दा उत्साहित छन् । स्याउ किसान सरोज शाहि भन्छन्, ‘केही दिन हिउँ निरन्तर आउनुपर्छ, अनिमात्र बालीनाली सप्रिन्छ, उत्पादन बढ्छ । हिउँदे बाली जौ, गहुँलाई राहत हुनुका साथै बगैँचा व्यवस्थापनमा सहज हुन्छ ।’

हिमपातले विशेषगरी कृषि क्षेत्रलाई राहत पुग्ने कृषि विकास कार्यालय जुम्लाका प्रमुख गणेश अधिकारी ले बताए । हिउँ नपरेर बाली सुक्न थालेको थियो । उनले भने , ‘बाली सुक्ने,उत्पादन घट्ने चिन्तामा किसान थिए । अहिलेको हिउँले बाली सप्रिने र स्याउ उत्पादन वृद्धिमा मद्दत पुग्छ ।’

हिमपातसँगै बढेको चिसोले कर्णालीको जनजीवन भने प्रभावित भएको छ । महिला बालबालिका, दिर्घरोगी, सडक मानव चिसाले प्रभावित भएका हुन् । चिसोले भाइरल ज्वरो आउन सक्ने भएकोले अत्यावश्यक काम बाहेक बाहिर नआउन र झोलिला पर्दाथ खान चिकित्सकको सुझाव छ ।

हिमपातले कर्णालीका हिमाली जिल्लाको हवाई तथा सडक यातायात पनि ठप्प भएको छ । जुम्ला नेपालगन्जको उडान, सँगै मुगु, हुम्ला र डोल्पाको हवाई उडान ठप्प भएको हो । सडक यातायात कर्णाली राजमार्ग, नाग्म र गमगढी सडकको यात्रा पनि रोकिएको छ । प्रमुख जिल्ला अधिकारी मुकेश केसरीले हिमपातपछि राहत उद्धार तथा पुनःर्स्थापनाको पूर्वतयारी मजबुद बनाइएको बताए । उनका अनुसार तीनै सुरक्षा निकाय तैनाथ अवस्थामा रहेका छन् ।