काठमाडौं, नेपाली कांग्रेसले नेकपा एमालेका अध्यक्ष केपी ओलीबाट एकीकृत समाजवादीका अध्यक्ष माधवकुमार नेपाललाई राष्ट्रपतिको उम्मेदवार बन्न प्रस्ताव आएको भनेर भ्रम सिर्जना गर्न खोजिएको बताएको छ ।
राष्ट्रपतिमा कांग्रेसको उम्मेदवारलाई प्रधानमन्त्री तथा माओवादी केन्द्रका अध्यक्ष पुष्पकमल दाहालले साथ दिने कांग्रेस महामन्त्री गगन थापाले बताए ।
‘केपी ओलीले माधव नेपाललाई राष्ट्रपतिको उम्मेदवारका रुपमा अगाडि सारेको भनेर हल्ला चलाइएको छ ।
त्यो सबै कन्फ्युजन क्रियट गर्ने कुरामात्र हो,’ उनले भने, ‘राष्ट्रपतिका सन्दर्भमा माओवादी र कांग्रेसबीच भएको सहमतिमा कुनै फरक पार्दैन । दाहालले राष्ट्रपतिमा कांग्रेसको उम्मेदवारलाई सहयोग गर्नुहुन्छ ।’
प्रधानमन्त्री प्रचण्डसँग निरन्तर संवादमा रहेका कांग्रेस महामन्त्री थापाका अनुसार ओलीले प्रस्ताव गरेको व्यक्ति राष्ट्रपति बन्ने सम्भावना छैन ।
ओलीले फैलाएको हल्लाको भरमा कांग्रेसले माधव नेपाललाई राष्ट्रपतिको उम्मेदवारका रुपमा अगाडि नसार्ने उनको भनाइ छ । ‘
कांग्रेसले रामचन्द्र पौडेललाई अगाडि सार्ने निश्चित भएको छ । अरु दायाँ–बायाँ हुने अवस्था छैन,’ उनले भने ।
महामन्त्री थापाका अनुसार केपी ओलीको प्रस्तावमा माधव नेपाल राष्ट्रपतिको उम्मेदवार हुने कुरा एमालेकै राष्ट्रपति भएजस्तै हो । ‘
यो कुरा दाहालले मान्ने सम्भावना छैन । अहिले दाहाल एमालेको गठबन्धनमा रहने कि कांग्रेसको गठबन्धनमा भन्ने मुल प्रश्न हो ।
को राष्ट्रपति बन्ने भन्ने होइन,’ उनले भने, ‘हामीले बाहिर छलफल नै गलत गरिरहेका छौं । दाहालले राष्ट्रपति को हुने भन्ने सुन्नुभएकै छैन ।’
कांग्रेसले प्रस्ताव नगरेसम्म माधव नेपाल राष्ट्रपति बन्ने अवस्था नरहेको उनको जिकिर छ । ‘
दाहालले कांग्रेससँगको गठबन्धनमा बस्ने निर्णय गरेपछि कांग्रेसले जसलाई अगाडि बढाउँछ, उही राष्ट्रपति बन्छ ।
माधव नेपाल कांग्रेसको प्रस्तावमा मात्र राष्ट्रपति बन्न सक्नुहुन्छ । त्यसका लागि कांग्रेसले प्रस्ताव गर्नुपर्छ,’ उनी भन्छन् ।
उनका अनुसार कांग्रेसले कुनै फाइदा हेरेर माधव नेपाललाई राष्ट्रपति बनाउछौं भनेर आयो भने मात्र उनी राष्ट्रपति बन्ने हो । ‘
कांग्रेसले प्रस्ताव गरेको व्यक्ति राष्ट्रपति हुने कुरामा कन्फ्युजन छैन । अब केपी ओलीले कसैलाई भनेर केही हुन्न । राष्ट्रिय राजनीति केपी ओलीको कोर्टभन्दा बाहिर गइसक्यो,’ महामन्त्री थापाले भने ।
उनका अनुसार दाहालले एमालेसँगै कै गठबन्धन कायम राखिराख्छु भन्दा एमालेले कसलाई प्रस्ताव गर्छ भन्ने कुराको अर्थ हुन्थ्यो ।
यसका लागि दाहालले एमाले नेतृत्वकै गठबन्धनमा बस्छु भनेर कित्ता क्लियर गर्नुपर्ने उनको भनाइ छ । ‘
अहिले दाहालले कांग्रेससँग बस्ने मन बनाएको हो नि १ कांग्रेससँग बस्ने मन बनाएको ठाउँमा एमालेले कसलाई प्रस्ताव गर्यो भन्ने कुराको के अर्थ भयो र ? ’ महामन्त्री थापाले भने ।
महामन्त्री थापाका अनुसार कांग्रेस र माओवादीबीच औपचारिक तहमा छलफल सुरु भइसकेपछि सत्ता समीकरण फेरबदल गर्ने सहमति ‘अन द स्पोट’ भइसकेको छ ।
तर, अहिले प्रक्रियाको हिसाबले दाहालले राष्ट्रिय सहमति भनिरहेका छन् । ‘कांग्रेसले पनि अहिले हाम्रो प्राथमिकता भएको बेलामा औपचारिक ढंगले सत्ता गठबन्धन फेरबदल गर्ने विषय प्रवेश गराउनु त भएन,’ उनले भने, ‘अहिले राष्ट्रपतिमा दाहालले कांग्रेसलाई मद्दत गर्ने र दाहालको सरकारको निरन्तरताका लागि नेपाली कांग्रेस सहयोगी रहनेमात्र औपचारिक सहमति भएको छ ।’
उनका अनुसार माओवादीले कांग्रेसलाई राष्ट्रपतिमा सहयोग गर्दा पनि एमाले सरकारबाट नबाहिरिए के गर्ने भनेर माओवादी र कांग्रेसबीच छलफल भइरहेको छ । ‘
तर त्यसमा पनि परिस्थितिले धकेल्दै कांग्रेस र माओवादीको हिजोको गठबन्धन बिउँतिने अवस्थामा पुर्याउँछ,’ उनी भन्छन् ।
उनका अनुसार आज कांग्रेस सभापति शेरबहादुर देउवा र एकीकृत समाजवादीका अध्यक्ष माधव नेपालबीच भेटवार्ताको तयारी छ ।
अहिले दाङको भालुवाङमा रहेका अध्यक्ष नेपाल अपराह्न ४ बजे काठमाडौं आउने छन् । त्यसपछि देउवा र नेपालबीच भेटवार्ता हुने उनले बताए ।
